Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 27 janeiru 2021 (TATOLI)–Xefe Estadu Maiór Jenerál F-FDTL, Majór Jenerál, Lere Anan Timor apela ba membru CPN-CNRT atu respeita líder rezisténsia, Kay Rala Xanana Gusmão hanesan “Patrimóniu Estadu” Timor-Leste.

Nu’udar veteranu rezisténsia, Lere la aseita, bainhira membru Konsellu Polítika Nasionál (CPN-sigla Portugeza)-Congresso Nacional de Reconstrução de Timor (CNRT) deside Xanana mak sai arguidu hodi ba hatán iha tribunál kona-ba keixa hosi Sekretáriu Jerál Partidu FRETILIN, Marí Bim Amude Alkatiri kontra akuzasaun sira hosi membru CPN-CNRT.

Notísia relevante: Reuniaun Estraodinária CPN-CNRT, deside Xanana mak hatán iha Tribunál

Antes ne’e, membru CPN-CNRT liuhosi konferénsia imprensa no mós halo publisidade iha jornál sira, hodi aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Marí Alkatiri ho osan millaun $2.5.

“Maun Xanana di’ak nafatin hanesan ne’e ami mós hakmatek. Nia hetan di’ak ami basa liman. Maibê kuandu Xanana monu ba sala ruma, ema sira ne’ebé hale’u, sira tenke kuidadu. Nu’udar veteranu, ami sei husu ba sira,” Komandante Lere ba jornalista iha Palásiu Prezidente Nicolau Lobato, Bairru Pité, Dili, kuarta ne’e.

Lere dehan veteranu hotu-hotu kontinua respeita Xanana no sira sei husu ema sira ne’ebé besik Xanana atu responsabiliza tanba keixa ne’ebé Marí Alkatiri hato’o la’ós hasoru Xanana, maibé hasoru membru CPN-CNRT sira.

“Agora CPN-CNRT dehan Maun Xanana maka bá, heipaa! Maun Marí dehan, ha’u la keixa Xanana,” Lere kestiona.

Komandante F-FDTL ne’e tatoli tan, sira sei kontinua hatudu solidariedade ba Xanana no sei la soe Xanana no respeita nafatin nia hanesan veteranu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here