Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 27 janeiru 2021 (TATOLI)–Komandu FALINTIL-Forsa Defeza Timor-Leste (F-FDTL) propoin ba Estadu atu taka totál fronteira Timor-Leste ho nasaun viziñu sira no la autoriza sidadaun sira tama-sai.

“Taka totalmente fronteira! Ema ida la sai. Ema ida la tama. Hanesan mós ita-nia portu no aeroportu,” Xefe Estadu Maiór Jenerál F-FDTL, Majór Jenerál, Lere Anan Timor, dehan bainhira hamutuk ho Vise Xefe Estadu Maiór Jenerál F-FDTL, Brigadeiru Jenerál, Domingos Raul “Falur Rate Laek”, hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, kuarta ne’e,  hafoin hato’o sira-nia pozisaun apoiu estensaun Estadu Emerjénsia (EE) ba da-sanulu.

Nia husu ba Governu tenke toma medida forte ba sidadaun sira ne’ebé kontra regra no órden hodi tama ilegál hosi Indonézia mai TL.

Tuir nia haree katak Governu labele husik ema sira ne’ebé tama ilegál depois hela iha kuarentena ramata tiha husik sira fila sein fó sansaun ruma.

“Ema tama ilegál ne’e krime, tanba nia lori moras mai,” nia realsa.

Komandante ne’e apela ba sidadaun sira bainhira identifika ema ruma tama ilegál tenke aprezenta keixa ba polísia hodi haruka sira ba hela iha kuarentena.

Lere subliña, moras COVID-19 perigu tebes ba ema hotu nia vida, tanba nasaun barak iha ekipamentu saúde modernu, maibé ema rihun mate, tan ne’e Timor-Leste tenke kuidadu an.

Nia hatutan, membru F-FDTL no PNTL ne’ebé iha fronteira hasoru risku, maibé tanba simu órden sira asegura metin seguransa hodi prevene moras labele tama Timor-Leste.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here