Ekipa ILO halo entrevista ho Ministru Obra Públika, Salvador Eugênio Soares dos Reis Pires, kona-ba implementasaun programa R4D. Imajen/MOP

DILI, 27 janeiru 2021 (TATOLI)–Ministru Obra Públika, Salvador Eugênio Soares dos Reis Pires, hetan entrevista husi konsultór independente na’in-rua International Labour Organization (ILO), hodi halo avaliasaun ba implementasaun programa Dezenvolvimentu Estrada Rurál (R4D, sigla inglés), molok  kontinua programa ne’e.

Ekipa konsultór sira halo avaliasaun ba programa ne’e tanba iha fulan-marsu tinan ne’e programa R4D sei ramata.

“Nune’e, antes kontinua programa refere presiza halo avaliasaun programa liuhosi entrevista ho ema lubuk ida hanesan membru Governu relevante, autoridade munisipál, autoridade lokál inklui komunidade, liga ho implementasaun projetu R4D iha área rurál,” refere nota imprensa ne’ebé Agência TATOLI asesu, kuarta ne’e.

Notísia relevante: TL-Austrália Extende Akordu Subsidiáriu R4D

Avaliadór na’in-rua ne’e mak hanesan Ti Moriston halo entrevista virtuál tanba daudaun hela iha Jakarta, Indonézia, enkuantu Jofimo Corbafo, halo entrevista direita hodi husu kona-ba prosesu implementasaun projetu R4D iha Timor-Leste.

Etapa dahuluk programa R4D hahú iha fulan-marsu 2012 to’o 2017 no etapa daruak hahú husi 2017 to’o 2019, no extende to’o marsu tinan 2021.

Durante entrevista, Ministru Salvador esplika prosesu administrativa, aprovizionamentu ba implementasaun obra inklui kontrolu kualidade projetu iha terrenu tanba projetu ida atu iha kualidade presiza iha supervizaun di’ak.

Aleinde ne’e, iha tinan 2019 rekruta tékniku 50, no iha tinan 2020 rekruta tan 100 atu halo supervizaun ba projetu sira iha terrenu iha kada munisípiu.

Projetu R4D implementa iha kada munisípiu no prosesu konkursu loke hodi fó oportunidade ba kompañia sira partisipa no kompete iha kada munisípiu.

Programa dezenvolvimentu estrada durante ne’e finansia husi Governu Timor-Leste liuhosi Orsamentu Jerál Estadu (OJE) iha verba ba Ministériu Obra Públika (MOP), no Governu Austrália apoiu ILO hodi fó asisténsia téknika liuhosi Diresaun Nasionál Estrada, Ponte no Kontrolu cheia (DNEPCC, sigla portugés) inklui Diresaun Jerál Obra Públika (DGOP, sigla portugés) MOP.

Hahú tinan 2012, programa R4D konsege fó asisténsia ba reabilitasaun no halo manutensaun estrada rurál hamutuk kilómetru 552, ne’ebé reprezenta 27% estrada rurál iha Timor-Leste.

Governu Austrália kompromete ona iha programa R4D, atu prevee orsamentu millaun AU$62, liuhosi ILO, atu fó asisténsia tékniku ba dezeñu no supervizaun, inklui mós kapasitasaun ba setór públiku no emprezáriu lokál.

Akordu estensaun ne’e ho durasaun to’o tinan 2021, ne’ebé sei konjuga ho programa Governu tinan-haat tuir mai atu kontinua reabilita no konstrui estrada nasionál pur volta kilómetru 300, estrada munisipál kilómetru 400, no estrada rurál kilómetru 500.

VIII Governu Konstitusionál nia misaun mak kontinua hametin konektividade fíziku iha territóriu tomak, atu asegura atividade ekonómiku, asesu ba merkadu povu no dezenvolvimenetu sosiál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here