Membru PN hosi Bankada FRETILIN, Antoninho Bianco.

DLI, 27 janeiru 2021 (TATOLI)–Prezidente Komisaun Komisaun D, Antoninho Bianco, hateten nia sente triste tanba  Autoridade Inspesaun Fiskalizasaun Ekonomia Sanitária (AIFAESA) nia kondisaun servisu la favorável tanba laiha laboratóriu atu halo teste ba  kualidade produtu.

“Problema ida ita identifika aat liu mak sira (AIFAESA) durante ne’e laiha laboratóriu atu deteta ai-han aat ka di’ak, liuliu mai hosi rai-li’ur no mós sira ne’ebé ke fa’an iha loja,” Prezidente Komisaun D Parlamentu Nasionál ne’ebé trata asuntu ekonomia no dezenvolvimentu, Antoninho Bianco hateten bainhira ramata vizita ba edifísiu AIFAESA, Matadouro, Dili, kuarta ohin.

Nia dehan, tanba laboratóriu laiha, entaun durante ne’e sira apreende sasán sira-ne’e, tenke koordena fali ho Ministériu Saúde atubele haree.

“Ne’e mak foin daudaun ne’e hosi Parlamentu aprezenta proposta, ha’u rasik husu, halo proposta atubele tenta kria laboratóriu para deteta sasán sira liu prazu ka lae,”  Bianco haktuir.

Deputadu komisaun D ne’e hatutan liután katak iha sira nia vizita ne’e mós deteta AIFAESA laiha kondisaun tanba laiha armazén ne’ebé atu rai sasán.

“Armazén mós laiha. Sira uza de’it kuartu rua hodi rai sasán sira ne’ebé hetan apreensaun. Sasán sira-ne’e sei rai kle’ur iha-ne’ebá, tanba iha prosesu balun hosi tribunál atu destroi ne’e mós sei kle’ur. Bainhira mak desizaun ne’e mai hosi tribunál, sasán ne’e aat hotu ona, entaun AIFAESA tenke destroi. Maibé hein atu destroisaun, sasán sira-ne’e  bele  dois ne’ebé bele afeta ba traballadór sira-nia saúde,” Bianco tenik.

Nia dehan, Komisaun D husu ona para bá-oin AIFAESA tenke haree hodi kria mós armazén, atubele rai sasán sira ne’ebé hetan apreensaun, la’ós mai tau fali iha edifísiu ida ke ema halo servisu ba.

Iha fatin hanesan, Koordenadór Jerál AIFAESA, Abílio Oliveira Serreno hateten prezensa Komisaun D ne’e hanesan vizita ida mai iha AIFAESA atu haree kondisaun servisu no hatene difikuldade sira ne’ebé durante  ne’e AIFAESA iha.

“Primeiru mak ne’e, ami-nia armazén laiha. Sira (Komisaun D) bele ba haree duni fatin tau produtu apreensaun sira ne’ebé AIFAESA foti bele provoka moras duni,” nia esplika.

Abílio haktuir, tinan-tinan AIFAESA sempre husu laboratóriu maibé Governu no Parlamentu Nasionál la konkretiza tanba osan ba ida-ne’e laiha.

“Tinan ne’e liuhusi programa Cesta Bázika sai lisaun ida no ida-ne’e mós atu fortifika tan katak AIFAESA presiza laboratóriu,” nia subliña.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here