Sekretáriu Estadu Juventude no Desportu, Abrão Saldanha. Imajen Tatoli/ Egas Cristovao

DILI, 27 janeiru 2021 (TATOLI) – Sekretáriu Estadu Juventude no Desportu (SEJD), Abrão Saldanha hateten, tinan ne’e planu prioridade ba SEJD mak oinsá halo maximiza sentru juventude sira iha nasionál to’o munisipál.

“Ami halo tiha ona diagnostika ida oinsá mak tau programa barak liu iha sentru juventude sira hanesan formasaun, empreendedorizmu no formasaun oioin mak sei halo iha sentru sira ne’ebé estabelese ona,” Abrão Saldanha  hateten ba Agência TATOLI iha edifísiu SEJD, Lecidere, Dili, kuarta ne’e.

SEJD mós planeia ona atu realiza festival ba joven kriadora iha Timor-Leste hodi kria espasu ba joven  sira hodi hatudu talentu ida-idak nian tuir poténsia ne’ebé iha.

Notísia Relevante : SEJD koopera ho Nova Zelándia haree ba dezenvolvimentu setór juventude

SEJD sei realiza jogu komunitáriu no fó mós formasaun ba tékniku sira hanesan treinadór, árbitru iha modalidade voleiból no futeból no atletizmu.

“Futeból nian ami sei servisu hamutuk ho Federasaun Futeból Timor-Leste mak sei haree no seluk ne’e Governu sei haree,” Abrão Saldanha hateten.

Nia hatutan, bainhira lori ona desportu ba munisípiu mak bele identifika talentu juventude sira iha area desportu ba modalidade oioin. Nune’e, bele identifika fini ba atleta ne’ebé di’ak atu partisipa iha eventu nasionál no internasionál sira.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here