Membru SIKN akompaña arguidu Liborio Pereira hodi tama ba TDD, kinta (04/12). Imajen Tatoli/Nelson de Sousa

DILI, 26 janeiru 2021 (TATOLI)-Tribunál Rekursu (TR) liuhosi akórdaun koletivu juis altera medida koasaun ba eis Prezidente Komisaun Funsaun Públika (CFP), Liborio Pereira.

Iha loron 05 dezembru 2020, Tribunál Distritál Dili (TDD) liuhosi desizaun primeiru interrogatóriu aplika medida koasaun proibisaun auzénsia ba arguidu Liborio Pereira hodi  bandu sirkulasaun arguidu nian ba rai-li’ur inklui halo apreensaun ba pasaporte arguidu nian.

Notísia Relevante : Polísia detein eis prezidente CFP iha MNEC

Parte defeza liuhosi Defensor Públiku, Sergio Quintas, ne’ebé fó asisténsia legál ba arguidu la konkorda ho desizaun ne’e, nune’e halo rekursu konta desizaun  primeiru interrogatóriu Tribunál  primeiru instánsia.

“Despaixu Tribunál Rekursu nian iha loron 21 janeiru, tinan ne’e, altera imediatu desizaun Tribunál primeira instánsia  ne’ebé aplika medida koasaun proibisaun auzénsia ba arguidu Liborio Pereira,” Sergio Quintas.

Nia hatutan, ho alterasaun ne’e parte Ministériu Públiku ba objetu apreensaun hanesan pasaporte sei entrega fila-fali ba arguidu no arguidu bele hala’o viajen fila-fali normal karik iha servisu externa balun tanba arguidu nu’udar ema diplomata.

Notísia Relevante : Liborio Pereira submete ba primeiru interrogatóriu ho hatais roupa detidu

Sergio Quintas, esplika, tuir entendimentu TR nian ba desizaun TDD primeiru interrogatóriu  la tuir konteúdu balun   iha artigu 183 ho 193 kódigu prosesu penál iha ne’ebé desizaun  juis prosesu la tau kestaun ba  indísiu forte, maibé tau de’it indísiu nune’e haree ba medida ne’e signifika la komete krime.

Arguidu Liborio Pereira, antes ne’e, submete ona ba iha primeiru interrogatóriu iha TDD ne’ebé deskonfia envolve iha kazu balun durante asume knaar hanesan Prezidente Komisaun Funsaun Publika iha tinan hirak liubá no arguidu daudaun inosente mezmu nune’e  hodi hein prova sira MP aprezenta iha julgamentu komún tuir mai iha Tribunál.

Notísia Relevante : TDD aplika medida koasaun proibisaun auzénsia ba arguidu Libório Pereira

Jornalista   : Nelson de Sousa

Editór        : Francisco Simões  

HAKEREK NO HATÁN

Please enter your comment!
Please enter your name here