Defensór Públiku, Sergio Quintas. Imajen/Dok

DILI, 26 janeiru 2021 (TATOLI)-Jurista Sergio Quintas, hateten kuandu sidadaun ida hato’o notísia  ruma kona-ba krime hasoru ema indivíduu  ba iha autoridade judisiáriu labele fó fali responsabilidade ba ema seluk.

“Saida mak akontese foin  daudaun  kuandu Sekretáriu Jerál Partidu FRETILIN,  Mari Alkatiri halo keixa ka denunsia ba iha Ministériu Públiku hasoru indivíduu  ne’ebé mak  iha partidu CNRT tanba ne’e indivíduu sira ne’e  ida-idak sei ba hatán iha  Ministériu Públiku la’ós lori naran partidu ka lori naran prezidente ida ne’e labele no hateten klaru iha kódigu penal,” Sergio Quintas, hateten ba Agéncia TATOLI Iha nia kna’ar fatin, Dili, tersa ne’e.

Notísia Relevante : Reuniaun Estraodinária CPN-CNRT, deside Xanana mak hatán iha Tribunál

Nia esplika, kuandu ema ruma hato’o keixa ka denunsia ba iha autoridade judisiáriu hanesan Ministériu Públiku hasoru ema ida iha notísia ruma kona-ba krime ema ne’e labele fó fali responsabilidade ba ema seluk tanba nia mak hatene notísia krime.

Nia esplika, artigu 12 kódigu penál iha ne’ebá hateten responsabilidade kriminál tanba infrasaun sira ne’ebé hakerek hela iha kódigu ida ne’e monu de’it ba pesoa singular (ba ema ida) labele ba ema rua ka tolu ka  lori naran organizasaun ida.

Tuir artigu 12  responsabilidade kriminál iha alínea  1. Responsabilidade kriminál tanba infrasaun sira-ne’ebé hakerek hela iha Kódigu ida-ne’e monu de’it ba pesoa singulár sira no labele tranzmite ba ema seluk. 2. Kuandu no iha kondisaun ne’ebé lei konsagra14 espresamente maka pesoa koletiva bele hetan responsabilidade kriminál tanba infrasaun prevista iha Kódigu ne’e ka iha lei espesiál.

Nia hatutan, lei fó dalan se ema ruma sente ofendidu atu buka justisa nu’udar sidadaun bele halo denúnsia ba krime públiku ruma ba iha Ministériu Públiku hafoin MP notifika parte sira ne’ebé presiza atu rona iha notísia krime ruma .

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here