Ilustrasaun akordu arbitrajen. Imajen/direitoprofissional

 

DILI, 26 janeiru 2021 (TATOLI)--Governu no Parlamentu Nasionál (PN) hahú debate no halo aprovasaun iha faze jeneralidade, ba proposta lei númeru 11/v/ (2a) rejime jurídiku arbitrajen voluntáriu no halo alterasaun ba kodigu prosesu sivíl  atu simplifika rezolusaun disputa komersiál sira, hadi’a ambiente negósiu no hadi’a dezempeñu administrasaun públika.

Vantajen proposta lei ne’e atu fasilita  investidór estrajeiru sira bele tama mai iha Timor-Leste ho  objetivu prinsipál sira mak hadi’a ambiente negósiu no reforsa seguransa jurídika husi tranzasaun komersiál no kumpre kontratu sira.

“Lejizlasaun ne’e kuandu investidór estrajeiru sira mai, ita halo kontratu no buat ruma naksalak iha ne’ebá (kontratu) tenke rezolve, tuir sistema arbitrajen atu rezolve litíjiu sira,” Ministru Justisa, Manuel Cárceres da Costa, hateten ba Agência TATOLI, hafoin diskusaun no votasaun jeneralidade ba  lejizlativu ne’e, iha planária PN, tersa ne’e.

Lejizalasaun númeru 11/v/ (2a) ho kapitulu XI inklui artigu 73, atu harii sentru arbitrajen hodi bele fasilita parte rua bainhira iha konflitu, bele hili arbitru hodi rezolve disputa.

“Lei ne’e fó dalan parte rua ne’ebé konflitu mak buka arbitru ka juiz, buka fatin no konkorda hanesan fatin iha Dili, Singapura ka Malázia inklui konkorda lian atu uza hodi tuur hamutuk rezolve litíjiuliu husi  arbitrajen atu halo prosesu konsiliasaun,” governante ne’e esplika.

Ministru Carcerés afirma, bainhira parte rua la konkorda malu no la simu dezisaun husi arbitrajen, maka bele rekere fali ba Tribunál Estaduál hanesan Tribunál Disritál Dili (TDD).

“Vantajen boot liu mak atu aselera prosesu, tanba kuandu koalia kona-ba kontratu ne’e iha negósiu nia laran, maibé ita husik prosesu ne’e la’o kleur no halo ema  lakon negósiu, liuliu prosesu kontratuál,” nia akresenta.

Tanba ne’e, Governu hakarak atu rezolve situasaun sira ne’e  atu labele enterope ema-nia negósiu no labele fó prejuizu barak ba letíjiu  tanba durante ne’e Timor-Leste uza de’it prosesu sivíl.

Iha biban hanesan, Ministru Prezidénsia Konsellu Ministru, Fidelis Manuel Leite Magalhães, hateten lejizlasaun ne’e atu fasilita disputa komerisál sira no hadi’a dezempeñu administrasaun públika.

Tuir governante ne’e, iha problema rua ne’ebé lei ne’e koko atu rezolve hanesan lakuna iha regulamentu no  meiu alternativu rezolusaun litíjiu.

“Ita avansa ho rejime arbitrajen voluntáriu ho  fiar katak halo di’ak liután prosesu litíjiu sira iha ita-nia rai, no sei kontribui iha tempu oin mai iha ambiente negósiu ne’ebé di’ak liu ho kompetetividade ho seguransa jurídika ba atividade komersiál no investimentu di’ak liu,” nia akresenta.

Kona-ba inkompletude iha sistema rezolusaun litíjiu sira, nia dehan, organizasaun jurídiku iha Timor-Leste liuliu Tribunál Estaduál rasik to’o agora hasoru difikuldade barak tanba kazu pendente a’as liu.

Governu nota kazu penál ne’e hetan rezolusaun lalais liu kompara ho kazu sivíl ne’ebé tarde liu no kazu hirak ne’ebé mak la presiza ba Tribunál mós lori hotu, tanba ne’e aumenta tan númeru asesu kazu pendente sira.

“Inisativa ne’e hanesan alternativa atu inunda ita-nia Tribunál sira hodi avansa ho métodu ida ne’e atu solusiona no rezolve problema pendete atu labele halo todan liután justisa formál,” governante ne’e subliña.

Nune’e, Governu husu ba PN atu apoia lejizlativu ne’e hodi fasilita nakloke-an ba mundu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here