Polísia feminina hala'o treinamentu oinsá atu atua situasaun ne'ebé disturba órden públiku. Imajen Tatoli/Eugénio Pereira

DILI, 26 janeiru 2021 (TATOLI)–Komandante Polísia Munisípiu Dili, Superintendente Xefe, Henrique da Costa informa polísia investiga ona joven na’in hitu kona-ba motivu tuda-malu entre joven iha área Eskola Bebonuk, Suku Bebonuk, Postu Administrativu Dom Aleixo, Dili.

Polísia konsidera asaun tuda-malu entre grupu joven ne’ebé akontese iha sesta (23/01/2021) tuku 08:00 dadeer to’o sábadu (24/01) meiudia afeta situasaun seguransa no movimentu transporte públiku.

“Ami bolu ona joven na’in hitu halo identifikasaun de’it. Hafoin ne’e ami husik fali sira, hodi kria situasaun bele la’o di’ak atu evita mosu beibeik problema,”  Komandante Henrique ba jornalista iha Kuartél Jerál PNTL, Caicoli, Dili, tersa ne’e.

PNTL Dili mós koloka Ofisiál Polísia Suku (OPS) no membru Konsellu Polísiamentu Komunitáriu (KPK) hodi koordena ho autoridade suku para rezolve problema ne’e.

PNTL mós kontinua koloka membru polísia sira halo operasaun ba área Bebonuk hodi hakalma situasaun labele kontinua mosu beibeik problema.

Iha parte seluk, Xefe Suku Bebonuk, Serafim Machado klarifika problema tuda-malu entre joven sira hosi Aldeia Metin-4 ho Aldeia Metin-1 ne’e inisia ho provoka malu to’o baku-malu rezulta joven balun kanek no motór balun hetan estragu.

Atu evita problema mosu beibeik, autoridade suku ne’e halibur ona grupu joven sira hodi rezolve tuir dalan família.

“Ami halo esforsu nafatin para bele buka rezolve problema ne’e,” autoridade suku ne’e informa ba jornalista.

Serafim husu atu joven sira kria dame hodi lori bairru ne’ebá hetan pás, nune’e kontribui ba estabilidade seguransa iha rai-laran.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here