DILI, 26 janeiru 2021 (TATOLI)-Ministériu Públiku (MP) liuhosi Prokuradora Angelina Saldanha, iha nia alegasaun finál husu Tribunál Distritál Dili (TDD) ba prosesu kazu tentativu omisídiu atu halo alterasaun kualifikasaun jurídiku ba krime ofensa integridade fíziku agravadu.
Parte defeza liuhosi Defensór Públiku, Humberto José Alves, aseita husu ba tribunál atu halo alterasaun kualifikasaun jurídiku ba krime ofensa simples. Tanba iha prosesu julgamentu arguidu konfesa parsialmente ba tribunál.
Tuir faktu hosi Ministériu Públiku (MP) aprezenta ba tribunál katak iha loron 25 dezembru 2018, maizumenus tuku 5:00 Otl, iha Aldeia Rai Nain, Suku Colmera, Postu Administrativu Vera Cruz, Munisípiu Dili, lezadu AA iha hela nia uma, mas derrepente maun hosi lezadu halai mai hodi foti besi ne’ebé uza iha janela hodi tau vidru lori ba halo problema ho arguidu JSXM tanba motivu arguidu lanu.
Lezadu halai ba ho intensaun ida atu hakarak akalma situasaun, nune’e lezadu hakuak arguidu, no arguidu hasai tudik ne’ebé nia sikat hela iha nia kotuk hodi ko’a lezadu nia kakorok no rasta mai to’o iha lezadu nia hirus matan.
Haree ida ne’e, lezadu nia maun lori besi ne’e hodi baku dala ida iha arguidu nia ulun hafoin ne’e la kleur komunidade sira mai akalma.
Konsekuénsia hosi arguidu nia hahalok ne’e konduta sira ne’e maka kauza lezadu hetan kanek iha kakorok no mós hetan kanek iha hirus matan.
Arguidu JSXM hakarak ho intensaun lori tudik hodi ko’a iha lezadu nia kakorok no mós rasta tudik iha lezadu nia hirus matan ho forma sira ne’ebé livre no konsientemente la ignora karakter sensuravel nia konduta.
Arguidu mós hatene katak sona atinjida ne’ebé arguidu hili hanesan kakorok no hirus matan bele halakon lezadu nian vida, maibé la konsege tanba tudik ne’ebé arguidu uza ladún kro’at nune’e ladún hetan kanek ne’ebé grave.
Arguidu hanesan autór material ho forma konsumada ba krime tentativa omisídiu ne’ebé previstu iha artigu 138 no artigu 23 no 24 hotu-hotu hosi kódigu penal no krime arma branka previstu no punidu tuir artigu 2 n.°2 al. a no, artigu 20/1 hosi lei arte marsiál, rituál, arma branka rama ambon, lei n° 5/2017.
Jornalista :Nelson de Sousa
Editór : Francisco Simões
