Estudante Timoroan na’in 58 hala’o asaun protesta iha Fronteira Batugade tanba portaun taka, domingu (05/04/2020). Imajen Tatoli/Eugénio Pereira

DILI, 26 janeiru 2021 (TATOLI) – Governu liuhosi Ministériu Negósiu Estranjeiru no Kooperasaun (MNEK) hasai ona despaxu hodi taka provizóriu pontu entrada Timor-Leste nian, hanesan  liña fronteira terrestre, portu no aeroportu relasiona ho Covid-19 iha nasaun viziñu sa’e maka’as.

“MNEK anúnsiu ba rezidénsia nasionál no internasionál  ne’ebé mak daudaun ne’e iha Timor-Leste katak, Governu sei taka temporariamante pontu entrada, aeroportu, portu no fronteira terrestre hahú hosi loron 25 janeiru to’o loron 01 fevereiru 2021,”  haktuir komunikadu imprensa ne’ebé Agéncia TATOLI asesu hosi MNEK, tersa ne’e.

Desizaun  ne’e halo bazeia ba deklarasaun estadu emerjénsia ne’ebé dekreta ona hosi Prezidente Repúblika, Francisco Guterres “Lú Olo” ho razaun númeru  kazu  importasaun Covid-19  aumenta iha Timor-Leste.

Mezmu taka pontu entrada sira, maibé Governu fó esepsaun ba tranzasaun pesoál  diplomata no konsulár sira, membru organizasaun internasionál, ajénsia kooperasaun internasionál, no funsionáriu sira iha setór petroleum, operasaun ba evakuasaun ema moras no transportasaun sasán international sira.

Ho oportunidade ida ne’e, MNEK mós hakarak anúnsiu ba sidadaun estranjeiru hotu ne’ebé maka serbisu iha Timor-Leste atu koopera.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here