Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 26 janeiru 2021 (TATOLI)–Sekretáriu Estadu Kooperativa, Elizário Ferreira hateten funsionáriu SEKOOP na’in-84 tuir formasaun iha área kooperativa no boa governasaun oinsá eleva koñesimentu iha jestaun boa governasaun nian no área kooperativa rasik.

“Formasaun ida-ne’e, formasaun ida ho ninia objetivu prinsipál mak oinsá atu asegura governasaun di’ak, liuliu servisu ne’ebé di’ak fó atendimentu públiku no internál SEKOOP nian rasik,” Elizário Ferreira dehan hafoin loke formasaun ba funsionáriu  SEKOOP na’in-84 ne’ebé hala’o iha Salaun Esperansa, Delta, Dili, segunda ne’e.

Nia esplika, formasaun ne’e atu ko’alia oinsá asegura kooperativa tuir duni prinsípiu kooperativa nian.

“Formasaun ida-ne’e liuliu atu  eleva mós  auditór sira-nia koñesimentu no sira-nia kapasidade oinsá mak atubele halo auditoria ida, la’ós atu sai juíz hodi kondena malu, maibé sai matenek ne’ebé fó moris ba instituisaun ida no asegura funsionamentu instituisaun nian tuir duni regra,” Elizário tenik.

Nia hatutan, hafoin formasaun loron rua, Sekretaria Estadu Kooperativa (SEKOOP) sei prepara funsionáriu sira sei tún bá munisípiu atu hahú halo servisu iha baze hodi sensibiliza servisu SEKOOP  liga ho kooperativa.

Iha fatin hanesan, Inspetór Gabinete Inspesaun ho Auditoria SEKOOP, Henrique de Oliveira Ximenes haklaken formasaun ida-ne’e dirije ba kargu dirijente, hanesan diretór jerál, diretór nasionál, xefe departamentu, ho funsionáriu públiku, nune’e hasa’e koñesimentu kle’an liu kona-ba kontrolu internu para servisu ne’e sai transparénsia liután.

Nune’e mós, Inspetór Jerál Estadu (IJE), Francisco Carvalho hateten envolvimentu IJE ba iha formasaun ne’e atu fahe informasaun ba funsionáriu no direjente sira hosi SEKOOP atu hasa’e sira-nia koñesimentu oinsá promove boa governasaun.

Entretantu, formasaun durante loron rua ne’e simu matéria hosi Provedoria Direitu Umanu Justisa (PDHJ-sigla Portugeza) no Komisaun Funsaun Públika (KFP).

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here