Ekipa Saneamentu Dili kontinua rekolla lixu iha dalan públiku sira. Imajen TATOLI/Joanico de Araújo.

DILI, 26 janeiru 2021 (TATOLI)-Xefe Departamentu Saneamentu Munisípiu Dili, Domingos Soriano, hateten durante ne’e ekipa saneamentu Dili kontinua rekolla lixu iha dalan públiku loro-lroron la’ós tanba situasaun COVID-19 maibé tanba atu haree Sidade Dili nia oin sai furak.

Notísia Relevante: Estadu Emerjénsia dasiak, ekipa saneamentu kontinua hala’o knaar

Nia hatutan, tanba iha tempu Estadu Emerjénsia ne’e ema hotu tauk ba pandemia COVID-19 maibé parte seluk bainhira lixu barak hamosu mós moras barak hanesan dangue no malária tanba ne’e parte saneamentu nia  traballadór sira kontinua hala’o servisu.

 “Ita ko’alia kona-ba lixu iha sidade laran no liuliu iha tempu Estadu Emerjénsia, moras la’os mak COVID-19 de’it maibé lixu barak  hamosu mós moras barak, ne’ebé parte sira-ne’e ita haree hotu. Tanba ne’e, Ministériu Administrasaun Estatál (MAE) liuhosi Dirasaun Saneamentu, ami kontinua nafatin servisu, loroloron halo hela rekollamentu lixu iha sidade laran lori ba soe iha lixeiru Tibar,” Domingos Soriono hateten ba Agénsia TATOLI iha nia knaar fatin, Edifísiu Administrasaun Munisipál, Matadouro, Dili, tersa ne’e.

Nia dehan, iha situasuan EE loloos traballadór raut foer iha públiku ne’e sira mós presiza deskansa maibé haree ema ba sidade ne’e kontinua ho foer no ema hotu dada-aan entaun saneamntu esforsu-aan nafatin atu kombate lixu ne’ebé komunidade prodúz iha sidade laran.

Nia afirma, traballadór sira ne’ebé durante servsiu saneamentu ne’e iha parte rua mak servisu saneamentu ba funsionáriu permante iha munisípiu Dili no funsionáriu temporáriu ne’e la’os Munisípiu Dili mak rekruta maibé liuhosi kompañia sira mak rekruta.

“Ne’ebé liga ba sira-nia saláriu ba funsionáriu permannete simu $115 maibé ba kompañia ne’ebé konrtatu, ida-ne’e ha’u labele fó komentáriu tanba Saneamentu Dili fó kontratu ba kompañia no kompañia halo kontratu ba pesoál ho kareta,” nia informa.

Nia subliña, ko’alia kona-ba saláriu mínimu nu’udar umanu  haree ba ida-ne’e sente la sufisiente, maibé nuudár sidadaun tenke kontribui nafatin ba rai ne’e maske ho osan ne’ebé uitoan.

“Agora Estadu mak iha hanoin atu hasa’e netik saláriu, tanba servisu ne’ebé saneamnetu ne’e todan. Traballadór simu ho osan ne’ebé kiik tanba tuir dekretu Governu nian,  ne’ebé atu muda ne’e bainhira iha ona lei mak foin bele muda saláriu mínimu ne’e,” nia dehan.

Xefe Departamentu Saneamentu Dili ne’e apela ba públiku liuliu komunidade sira iha Sidade Dili atu labele soe foer arbiru maibé tau lixu tuir nia-fatin ne’ebé Governu prepara ona.

“Ha’u-nia mensajen ba sidadaun hotu-hotu liuliu iha sidade Dili, katak labele prodús lixu arbiru iha fatin públiku maibé tenke tau hamutuk iha nia-fatin ne’ebé Governu prepara ona,” nia apela.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Sr. Domingos, faktus konaba lixu iha Dili laran ne’ebe ita sempre hasoru iha area publiku sai hanesan kestaun-problema bot ba strategia gestaun lixu nian. Atu husu deit, produsaun lixu iha Timor Leste (Dili) too porsentu hira ona? Ita bot sira sempre halo studu ba kresimentu husi lixu nee ga lae?

HAKEREK NO HATÁN

Please enter your comment!
Please enter your name here