Jogadór na'in-tolu ne'ebé Boavista FC Timor halo hela negosiasaun ba kontratu. Imajen/Espesiál

DILI, 26 janeiru 2021 (TATOLI) – Époka ne’e, klube sira hosi primeira divizaun komesa hatudu sira-nia preparasaun atu enfrenta kampiaun Liga Futeból Timor-Leste (LFTL), Tasa 12 Novembru, Super Tasa no kopa Federasaun Futeból Timor – Leste (FFTL).

“Ami kontratu ona ho eis jogadór Ponta Leste, Daniel Donkor. Nia asina ona kontratu ho ami iha Dezembru tinan kotuk,” Cicu Gusmão, na’in ba klube Boavista FC Timor, informa ba jornalista iha nia rezidénsia Bairru Sentrál, Dili, tersa ne’e

Nia hateten, Boavista FC Timor mós halo negosiasaun hela ho jogadór Indonézia nian hosi klube PSM Makasar, Ferdinand Sinaga, no bainhira estadu emerjénsia hotu nia bele tama ona mai joga iha Timor-Leste.

Boavista FC Timor  haree hela jogadór lokál ida hosi Karketu Dili FC, Abaty  maibé sei iha hela faze negosiasaun.  Maske nune’e, Abaty mós fó ona resposta ba Boavista atu  asina kontratu ho Boavista.

“Abaty nia resposta mai ami mak ne’e, nia dehan maun deskulpa durante ne’e ha’u seidauk fó resposta ba maun tanba ha’u sei hein hela Karketu atu bolu ha’u ko’alia kona-ba kontratu ne’e mak fó info kleur liu ba maun, hein tia lai info hosi maun sira iha Karketu foin ha’u bele foti desizaun,” Cicu Gusmão haktuir.

Nia dehan, daudauk ne’e Boavista fó ona kontratu ba jogadór hamutuk na’in-22 kompostu hosi timoroan na’in-19 no estranjeiru tolu (3) no sei buka tan jogadór hodi kompleta jogadór 28.

Saláriu ba jogadór Boavista

Iha fatin hanesan Jestór klube Boavista, Ezzy Leong, hateten kontratu ne’ebé haraik ba jogadór sira tuir estandar ne’ebé fó sai ona hosi Federasaun Futeból Timor-Leste (FFTL) no Liga Futeból Timor-Leste (LFTL) iha ne’ebé jogadór sira tenke simu $250,  maibé jogadór hotu iha Boavista kada fulan simu $350.00.

Nia esplika, saláriu ba jogadór mak nune’e maibé seidauk konta ho bonus ne’ebé klube haraik bainhira jogu manan klube sei selu jogadór kada jogu ida $50,00 no lakon $20,00.

Klube mós halo konkordánsia ho jogadór sira bainhira lori Boavista kampiaun iha jogu haat hanesan LFTL, Tasa 12 Novembru, Supertasa no Kopa FFTL maka osan hosi prémiu jogu sei entrega hotu ba jogadór sira no klube kalkula ona kada jogadór sei simu $6,000.00 bainhira manan iha jogu haat ne’e.

Iha parte seluk nia informa, Boavista mós kontratu ho doutór espesiál ba klube atu nune’e bele halo tratamentu ba jogadór sira ne’ebé hetan aleija no Boavista mós halo kompromisu ho jogadór sira bainhira sei joga iha Boavista hetan moras lori ba rai-li’ur Boavista mak sei finansia.

Jornalista   : Hortencio Sanchez

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here