Sekretáriu Estadu Juventude no Desportu, Abrão Saldanha. Imajen SEJD/Dok.

DILI, 25 janeiru 2021 (TATOLI) – Operadór telekomunikasaun Timor Telecom (TT) koordena ona ho Sekretáriu Estadu Juventude no Desportu (SJD) hodi instala internet gratuita ba juventude sira iha Dili laran.

“SEJD hamutuk ho TT selebra protokolu atu instala internet gratuita ba juventude sira. TT oferese internet gratuita SEJD oferese fatin atu instala internet hodi benefisia ba joven sira,” Sekretáriu Estadu Juventude no Desportu (SEJD),  Abrão Saldanha, informa ba Agéncia TATOLI, segunda ne’e, iha edifísiu SEJD, Lecidere, Dili.

Internet ne’e sei monta iha sentru juventude tolu iha kapitál Dili hanesan Becora, Comoro no arredores edifísiu SEJD nian rasik.

“Ida ne’e hanesan primeiru pasu tuir mai bainhira avalia nia progresu sira hotu, posibilidade sei bele extende tan no halo mós iha sentru juventude fatin hotu,” Abrão Saldanha tenik.

Iha fatin hanesan responsavel komunikasaun Timor Telcom José Agostinho da Costa hateten, servisu ne’e hanesan parte ida hodi apoiu SEJD iha area juventude nian hodi asesu ba internet.

“Ita estabelese internet gratuita hanesan meiu ida hodi ajuda SEJD nia servisu iha area juventude nian. Iha tempu besik ita nia tékniku sira komesa hahú instala ona atu bele fó benefísiu ba estudante no juventude sira,” nia hateten.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here