iklan

EDUKASAUN, COVID-19, VIQUEQUE

Orientasaun iha ESG Canossa Ossú, esplika vizaun-misaun eskola

Orientasaun iha ESG Canossa Ossú, esplika vizaun-misaun eskola

Madre Célia Freitas, FdCC ofisialmente loke programa orientasaun 2021. Imajen/Facebook

VIQUEQUE,22 janeiru 2021 (TATOLI)—Eskola Ensinu Sekundáriu Jerál (ESG, sígla portugés) Santa Madalena de Canossa Ossú, munisípiu Viqueque, hala’o ona orientasaun ba estudante foun ho konteúdu, esplika kona-bá vizaun no misaun eskola nian, inklui regulamentu sira.

Diretora eskola, madre Célia Freitas, FdCC hateten konteúdu loloos hosi orientasaun ba estudante foun sira maka, introdús vizaun no misaun eskola nian, nune’e mós lori estudante sira integra aan iha regulamentu ne’ebé estabelese ona.

Notísia Relevante:Manorin sira tenke implementa zero toleransia ba violénsia iha eskola

“Programa ne’ebé hala’o iha loron 18 fulan janeiru ne’e maka, palestra sira kona-bá vizaun no misaun eskola nian no mós regulamentu ne’ebé estabelesidu,”Madre Célia esplika ba kontribuidór Agência Tatoli, iha Ossú, sábadu ne’e.

Iha loron 19 janeiru, nia hatutan, estudante foun sira submete kedan ba teste hodi hili sira-nia ramu estudu, enkuantu, estudante tuan sira hanesan 11o no 12o anu, hahú kedan sira-nia prosesu ensinu aprendiajazen.

Relijioza ne’e esplika, tuir kalendáriu nasionál ne’ebé aprova hosi Ministériu Edukasaun Juventude no Desportu (MEJD), katak, loron 13 janeiru nu’udár loron inísiu ba tinan hanorin 2021 nian.

Tanba ne’e, ESG Ossú hanesan instituisaun edukativa ida, submete mós ba desizaun no orientasaun hosi MEJD, relativamente ho inisiasaun tinan hanorin 2021 inklui medida preventiva ba COVID-19 hosi Ministériu Saúde, ho baze Dekretu Prezidente Repúblika kona-bá implementasaun Estadu Emerjénsia dasiak.

“Ami prepara nafatin bee moos ho sabaun iha kada sala-de-aula, uza rapid scanner ba estudante sira bainhira atu tama sala-de-aula, uza nafatin máskara inklui lori idaidak nia hand sanitizer no mantein distansiamentu soiál,” nia subliña.

Sala-de-aula ezistente iha eskola ne’e hamutuk sia (9) ne’ebé sufisiente no hotu-hotu uza iha parte dadeer, tanba lorokraik sempre udan no difikulta estudante sira-nia prezensa iha eskola.

Madre Célia subliña katak, maski prosesu aprendijazen la’o ona, maibé sei kontinua akompaña nafatin situasaun, liuliu COVID-19 ne’ebé iha semana ne’e númeru pozitivu kontinua aumenta, bainhira iha desizaun ruma hosi Governu atu suspende atividade eskolár, maka eskola sei obedese.

Fasilidade iha eskola ne’e sufisiente no laiha problema tanba iha laboratóriu komputadór ne’ebé natón, iha biblioteka ne’ebé tuir padraun edukasaun nian, hodi fasilita estudante sira, kompleta ho material didátiku sira seluk.

“Ami nia difikuldade mak finanseira, tanba ami iha funsionáriu kontratadu parsiál na’in 17,” nia informa.

Tinan ne’e ESG Ossú simu estudante foun hamutuk na’in 117, ne’ebé fahe ona ba sala tolu, ramu Siénsia  no Teknolojia (CT) turma ida no siénsia sosiál umanidade (CSH) turma rua.

Estudante sira hosi 11o  anu hamutuk na’in 114 ne’ebé fahe ba sala CT hamutuk rua no CSH sala ida, enkuantu 12o anu hamutuk na’in 96 ne’ebé fahe ba sala CT rua no CSH sala ida, nune’e totál estudante ba tinan ida ne’e hamutuk na’in 327.

Totál profesór ne’ebé hanorin iha eskola ne’e hamutuk na’in 27. Hosi totál ne’e, na’in lima hanesan funsionáriu permanente, na’in lima hanesan profesór kontratadu Governu nian, no na’in 17 nu’udár kontratadu parsiál ho Fundasaun Canossa.

Entretantu, Vizaun hosi eskola ne’e maka: forma estudante nia fuan nu’udár sentru ba nia aan tomak atu sai ema ne’ebé iha hanoin no hahalok hodi fiar no hadomi Maromak no maun alin sira.

Alende ne’e, atu transforma estudante sira nia fuan ho valór kristaun Katólika no dignidade kultura umana.

Misaun maka:

Hanorin dixiplina sira ne’ebé iha ba alunu sira no tulun sira hodi deskobre matenek siénsia no globalizasaun teknolojia mundu ohin loron nian.

Forma alunu idaidak nia fuan hodi moris di’ak iha hanoin no hahalok nu’udár ema ne’ebé iha kultura rasik iha sosiedade no ilas Maromak nian tuir doutrina uma Kreda Katólika.

Eduka alunu sira atu bele dezenvolve sira nia kapasidade intelektuál no talentu ne’ebé iha, atu bele sai ema ne’ebé produtivu no kriativu iha sosiedade, nasaun no Igreja.

Kontribuidór: Memensio Sequeira Freitas

Editór: Cipriano Colo

iklan
iklan

One Comment

Leave a Reply

iklan
error: Content is protected !!