Ministru Finansa, Rui Augusto Gomes. Imajen TATOLI/Egas Cristóvão.

DILI, 25 janeiru 2021 (TATOLI)–Ministru Finansa, Rui Augusto Gomes, kontinua pronúnsia katak Governu seidauk iha nesesidade atu husu levantamentu hosi fundu petrolíferu tanba saldo atuál iha tezouru sufisiente atu sustenta mákina Estadu.

“Ita-nia saldo ne’ebé agora daudaun iha Banku Sentrál Timor-Leste (BCTL, sigla portugés) millaun $230, ne’ebé seidauk iha nesesidade atu halo levantamentu, maibé Ministériu Finansa (MF) sei kontaktu ho Banku Sentrál iha fulan-fevereiru hodi halo levantamentu,” Ministru Rui Gomes hateten hafoin enkontru ho Primeiru-Ministru (PM), Taur Matan Ruak, iha Palásiu Governu, segunda ne’e.

Tuir governante ne’e, iha inísiu tinan fiskál foun ne’e, Governu foin ezekuta porsentu balun.

“Governu foin ezekuta osan 1% iha orsamentu 2021, ezekusaun ne’e kiik-oan, ne’ebé ita laiha problema ho cash tanba ita sei iha osan,” nia esplika.

Antes ne’e, Ministru Rui pronúnsia bainhira saldo iha tezouru nia montante tun ona ba millaun $200 ba kraik maka foin bele husu levantamentu.

Notísia relevante: OJE 2021: Saldo tezouru sufisiente, MF seidauk husu levantamentu

Kona-ba montante hira mak Governu sei halo levantamentu, Ministru deside la fó komentáriu no promete sei fó sai informasaun bainhira halo ona levantamentu.

OJE 2021 hamutuk billaun $1,895, ne’ebé hosi fundu petrolíferu biliaun $1,377 no reseita naun petroíferu millaun $508.

Orsamentu tinan ne’e kompostu hosi saláriu no vensimentu millaun $239,2 bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here