DILI, 25 janeiru 2021 (TATOLI)–Diretór Ezekutivu Institutu Apoiu Dezenvolvimentu Emprezariál (IADE), Filomeno Marçal Belo informa iha marsu tinan ne’e, IADE sei lansa programa kompetisaun planu negósiu ba joven sira nune’e fó oportunidade ba juventude envolve an iha negósiu.
“Iha marsu mai ne’e, ami sei lansa programa ida kompetisaun planu negósiu ba ita-nia joven sira,” Filomeno ba jornalista sira iha salaun João Paulo II, Comoro, Dili, segunda ne’e.
Nia hatutan, programa kompetisaun planu negósiu ne’e IADE sei aposta ba formasaun emprezariál iha tinan ne’e.
“Ami-nia formasaun ne’e, espesífiku liu mak ba formasaun konselllamentu emprezariál, formasaun marketing jestaun emprezariál no jestaun finansiamentu emprezariál,” Filomeno esplika.
Tuir nia katak formasaun sira-ne’e importante tebes nune’e emprezáriu sira bele hatene liu halo jestaun ba sira-nia funsionáriu.
“Ami tenke halo parseiru di’ak ho sira, tanba emprezáriu sira mak parseiru Estadu iha prosesu dezenvolvimentu,” Diretór Ezekutivu IADE ne’e tenik.
Filomeno hateten, formasaun emprezariál ne’ebé mak IADE fó ne’e hahú nível mikro to’o negósiu pekena empreza.
“Durante ami eziste, ami fó formasaun barak ona ba emprezáriu sira. Iha 2020 de’it ami fó formasaun hamutuk 170 no ami promete kontinua fó formasaun emprezariál ba ita-nia emprezáriu sira nune’e sira halo jestaun di’ak ba sira-nia negósiu,” Filomeno haktuir.
Jornalista : Natalino Costa
Editór: Xisto Freitas
