Prezidente ANPM, Florentino Mateus Soares Ferreira. Imajen Tatoli/Egas Cristovão

DILI, 25 janeiru 2021 (TATOLI)—Autoridade Nasionál Petróleu no Minerál (ANPM) sei taka konkursu públiku mina no gás hamutuk bloku 18, kompostu husi 11 iha tasi-laran no hitu iha rai-maran iha outubru tinan ne’e.

Ba kestaun ne’e, tuir Prezidente ANPM, Florentino Mateus Soares Ferreira, empreza sira presiza halo estudu ba dadus ne’ebé fornese atubele foti desizaun iha Konsellu Administrasaun ka board, mak submete fali proposta ba ANPM.

“Ita sei finaliza iha fulan outubru tinan ne’e, hafoin haree empreza hira mak hatama aplikasaun no ita halo avaliasaun, hafoin tama parte anúnsia manan-na’in atu sira bele prepara  proposta halo negosiasaun ba kontratu partilla fahe produsaun no asina, hafoin halo dezenvolvimentu perfurasaun,” Prezidente Autoridade, informa iha salaun Ministériu Finasa, Aitarak-laran, segunda ne’e.

Notísia relevante: Outubru 2021, Timor-Leste taka konkursu públiku petrolíferu iha bloku 18

Nia dehan, tuir kalenáriu hafoin taka aplikasaun konkursu maka foin hatene empreza hira mak kompete iha investimentu ne’e.

“Ita haree iha empreza lubuk ida hatudu ona interese, maibé importante iha outubru tinan ne’e, ita sei loke kaixa aplikasaun konkursu públiku hodi hatene empreza hira mak iha seriedade investe,” nia tenik.

ANPM nota katak, hafoin halo promosaun ba nasaun barak, hatudu katak empreza lubuk mak iha interese, maibé seidauk iha konkluzasaun katak sira hakarak investe.

Tuir regra, atu anúnsia empreza ida sai vensedór  presiza haree prestasaun serbisu ne’ebé iha, liuliu foku ba proposta téknika no finanseira.

“Ita mós tenke haree kapasidade finaseiru empreza, tanba investimentu ne’e boot no presiza despeza boot atu hahú esplorasaun, liuliu ba estudu sízmiku no perfurasaun inklui dezenvolimentu kampu,” nia subliña.

Empreza sira ne’ebé atu sai manan-na’in ba konkursu públiku ne’e presiza iha finansiamentu, foku ba kontiúdu lokál no kompromisu ba komunidade afetadu projetu inklui loke empregu no oportunidade fornesimentu bens no servisu, treinamentu no seluk tan.

Iha loron 03 outubru 2019, ANPM ho apoia husi IN-VR Oil & Gas realiza simeira internasionál kona-ba Petróleu no Gás Timor-Leste (Timor-Leste Oil & Gas Summit 2019) no biban ne’e Governu Timor-Leste liuhosi Primeiru-Ministru, Taur Matan Ruak, lansa ona konkursu públiku ba mina no gás hamutuk bloku 18.

Iha bloku hirak ne’e, bazeia ba estudu sízmiku iha estrutura fatuk no basia ne’ebé iha potensialidade boot bele akumula petróleu no gás.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here