Dezeñu Detalladu Enjeñeria ne’ebé aprezenta hosi konsultór Internasionál JV PT. Imajen/MOP

DILI, 25 janeiru 2021 (TATOLI)—Konsultór Internasionál JV PT aprezenta dezeñu detaladu (DED-Detailed Engineering Design) ospitál Lahane, Dr. Antonio Carvalho, ba tékniku kompostu hosi Asesór no tékniku Abitasaun no Planeamentu Urbanizmu gabinete Ministériu Obras Públikas (MOP).

Aprezentasaun ne’e via online, tanba daudaun konsultór  sira iha hela Indonézia. 

Tuir nota ne’ebé Agência TATOLI asesu, iha aprezentasaun ne’e, hetan rekomendasaun hosi ekipa Project Steering Committee, ne’ebé lidera husi Diretór Jerál, Roger Tertuliano Belo, inklui na’in ba projetu, Ministériu Saúde inklui fasilitadór MOP, Ajénsia Dezenvolvimentu Nasionál (ADN) no Ministériu Planu no Ordenamentu (MPO). 

Maski atividade konsultór iha faze preparasaun relatóriu difikulta tanba situasaun pandemia COVID-19, maibé nafatin iha kompromisu atu hato’o relatóriu ho kualidade a’as hodi responde ba nesesidade Governu no nasaun reabilita ospitál tuan Lahane hodi akomoda nesesidade saúde.

Iha aprezentasaun ne’e marka mós prezensa hosi konsultór lokál Timór hodi akompaña prosesu ne’e.

Antes ne’e, Primeiru-Ministru, Taur Matan Ruak, akompaña hosi Ministra Saúde, Odete Maria Freitas Belo, no Vise-Ministru, Bonifácio Maucoli dos Reis, hala’o observasaun ba reabilitasaun Antigu Enfermaria Pediatria, Ospitál Dr. António Carvalho, Lahane, hodi haree besik progresu. 

Reabilitasaun ne’e nu’udar preparasaun Governu iha tinan kotuk bainhira Timor-Leste hasoru hela situasaun COVID-19, ho objetivu atu uza ba sala izolamentu pasiente infetadu, karik Timor-Leste iha kontájiu pozitivu ne’ebé grave. 

Xefe Ezekutivu husu ba Ministra Saúde ho ninia ekipa, atu halo rehabilitasaun ba parte leten (Ospitál Lahane) ne’ebé seidauk reabilita, nune’e bele transfere moras kontájiu sira iha HNGV ba fatin ne’e, tanba ospitál nasionál daudaun ne’e ladún iha ona espasu. 

Antigu Enfermaria Pediatria ne’e, reabilita husi kompañia Hedge Construction Unipessoal Lda. iha maiu 2020 ho fundu COVID-19 hamutuk $450.153,32. 

Daudaun ne’e progresu reabilitasaun fíziku hotu ona inklui monta hotu ona osijéniu paralelu ba kada sala, Ar Kondisionáriu, instalasaun eletrisidade internu inklui lampu sira, enkuantu sei falta mak jardín, koneksaun ba liña eletrisidade no moru hale’u.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here