Komandante Jerál PNTL, Komísariu Faustino da Costa.Imajen/Antonio Goncalves

DILI, 25 janeiru 2021 (TATOLI)–Komandante Jerál Polísia Nasionál Timor-Leste (PNTL), Komisáriu Polísia Faustino da Costa no Segundu Komandante, Komisáriu Polísia, Mateus Fernandes, hala’o enkontru ho ofisiál superiór no komandante PNTL hosi munisípiu hotu-hotu.

Objetivu hosi enkontru ida-ne’e halo analiza ba rezumu lei númeru 7/2020, 26 agustu, kona-ba medida ba prevensaun kombate korrupsaun.

“Ita esplika hela lei ne’e ba komandante sira hotu hodi hatene artigu relevante sira kona-ba medida kombate korrupsaun ne’e liga ba servisu polísia nian,” Komisáriu Faustino ba jornalista iha Kuartél Jerál PNTL, Caicoli, Dili, segunda ne’e.

Tuir planu, nia dehan, iha tempu besik, Komandu PNTL sei konvida parte Komisaun Antí Korrupsaun (KAK) atu halo esplikasaun kle’an ba komandante PNTL sira hodi bele entende hodi halo servisu PNTL ho profisionál liután.

Ajenda seluk tan mak, Komandu PNTL rona aprezentasaun relatóriu servisu hosi ofisiál superiór no komandante munisípiu sira hodi avalia implementasaun Estadu Emerjénsia (EE) dasiak.

Faustino salienta katak avaliasaun ne’e haree liubá regra no operasaun ne’ebé PNTL halo hodi aperta sidadaun sira hala’o viajen bá fatin hotu uza máskara, hapara atividade eskola, misa iha Igreja no kontrolu distánsia sosiál  iha fatin públiku sira.

Iha enkontru ne’e, Komandu PNTL alerta ba komandante hotu-hotu atu kontinua halo operasaun másimu iha fatin hotu no asegura metin liután seguransa iha liña fronteira terrestre no tasi nian.

“Ita hatene COVID-19 iha nasaun viziñu Indonésia sa’e maka’as, tanba ne’e ita halo enkontru hodi avalia implementasaun Estadu Emerjénsia saida mak PNTL presiza halo no reforsa tan seguransa iha fronteira,” nia hateten.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here