Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 25 janeiru 2021 (TATOLI)–Ministru Koordenadór Asuntu Ekonómiku (MKAE), Joaquim Amaral konsidera laiha problema bainhira Governu deside envolve foos importasaun iha produtu Cesta bázika.

Tuir governante ne’e katak iha dekretu lei Governu nian ne’ebé mak antes ne’e Konsellu Ministru aprova ne’e la bandu foos importasaun tama iha produtu Cesta Bázika.

“Lae! Dekretu lei iha lista hakerek momoos foos mutin. Foos mutin bele mai hosi rai-laran no bele mai hosi rai-li’ur,” Joaquim Amaral ba jornalista sira iha salaun João Paulo II, Comoro, Dili, segunda ne’e.

Nia dehan, programa Cesta Bázika nu’udar programa hola parte iha rekooperasaun ekonómika nian atu insentiva agrikultór sira.

“Iha faze sira ne’ebé ita introdúz husi novembru to’o janeiru, ita fó preferénsia boot liu atubele sosa foos ne’ebé prodúz iha ita-nia rai para ita aproveita barak liu ho másimu foos ne’ebé mak prodúz husi ita-nia agrikultór sira. Maibé, bainhira situasaun ne’e la’o, to’o iha janeiru, ita haree katak foos rai komesa menus,” nia haktuir.

“Se ita hein ema to’o kuda tan fali, konserteza programa Cesta Bázika ne’e to’o nia tempu hotu mós programa ne’e seidauk hotu,” Joaquim hatutan.

Ezekutivu ne’e tenik, nia parte hasai ona despaisu iha semana kotuk hodi fó autorizasaun foos imporasaun bele involve iha produtu Cesta Bázika.

“Semana kotuk despaisu ministeriál sai  tiha ona, atu uza foos importasaun ho ninia tabela presu sira,” Joaquim katak.

Jornalista: Natalino Costa

Editór: Xisto Freitas

1 KOMENTÁRIU

  1. Foos importasaun so para halo emprejario boot sira nia bolsu mahar,no halo ita nia agrikultor sira baruk ten nune osan laiha bele afeita mos ba mal nutrisaun,fos importasaun mos bele halo agrikultor sira iha rai estranjeiro maka bosu didiak, ho programa ita nian ne’e.
    Hanesan Timor oan nanis kedas laos han foos mutin deit maka moris,maibe han mos batar, talas,fehuk aifarina,hudi mos bele moris,tuir hau nia observasaun aihan sira nee butuk loos iha merkadu hali laran neba,husu ba guvernu atu hare no maneja hodi fahe kupon mai ami bele ba fihir deit iha merkadu hali laran nune bele ajuda agrikultor sira hetan osan hodi hadia sira nia moris.

HAKEREK NO HATÁN

Please enter your comment!
Please enter your name here