Primeiru-Ministru, Taur Matan Ruak, konvoka enkontru ho Diretór CIGC, Brigadeiru Jenerál João Miranda ‘Aluk’, iha Palásiu Governu, segunda (25/01). Imajen TATOLI/Egas Cristovão

DILI, 25 janeiru 2021 (TATOLI)–Diretór Sentru Integradu Jestaun Krize (CIGC, sigla portugés), Brigadeiru Jenerál, João Miranda ‘Aluk’ rekomenda ba Primeiru-Ministru (PM), Taur Matan Ruak, atu aplika medida rigorozu ba sidadaun ne’ebé tama ilegál mai territóriu nasionál via fronteira terrestre.

Nia nota katak, durante ne’e maski Governu aplika ona medida atu reforsa efetivu iha fronteira terrestre sira maibé sidadaun balun kontinua hakat tama ho dalan ilegál.

Iha enkontru ne’e, Brigadeiru Aluk haktuir, ko’alia oituan kona-ba serbisu Sentru Integradu Jestaun Krize inklui pasajen ilegál iha área fronteira terrestre.

Notisia relevante: PM Taur Enserra Sala Situasaun Maibé Gabinete Jestaun Krize Kontinua Funsiona

“Fó hanoin ba Primeiru-Ministru atu foti medida ba ema sira tama ilegál nafatin, maski Governu fó oportunidade ba sira liuhosi dalan legál saida de’it ne’ebé organiza hosi instituisaun Estadu sira. Rekomendasaun ne’ebé ha’u fó katak iha nesesidade Governu foti medida duru duni tanba sira abitua ona katak kuandu tama klandestinamente, Governu liuhosi ekipa Ministériu Saúde aplika tau sira iha kuarentena durante loron-14,” Brigadeiru Aluk hateten hafoin hasoru malu ho Xefe Governu, iha Palásiu Governu, segunda ne’e.

Tanba ne’e, nia husu Governu aplika medida forte, bainhira hetan sidadaun tama ilegál, presiza aplika uluk sansaun disiplina, tanba aumenta seguransa iha fronteira sei la rezolve problema ilegál, tanba ne’e dalan di’ak liu maka Governu tenke aplika medida duru.

“Medida duru ne’ebé ha’u rekomenda maka kaer sira ne’ebé tama ilegál, aleinde lori sira ba kuarentena, tenke aplika sansaun disiplinár ou kastigu, otél ne’ebé uza hodi sai fatin kuarentena ba sira ne’e, ba kualker alimentasaun sira mak tenke selu rasik,” Diretór CIGC sujere.

Nia dehan, iha posibilidade re-ativa Sala Situasaun CIGC maibé depende evolusaun situasaun ba moras COVID-19, kuandu mosu ona transmisaun komunitária maka sei husu ba Governu atu re-ativa no husu atubele Governu bolu fali ekipa sira ne’ebé uluk hamutuk iha sentru ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here