Hakerek nain, Memensio Sequeira Freitas.

(Abordajen simples ida atu ajuda profesór sira ba melloramentu kualidade ensinu iha Timor-Leste)

Hosi: Memensio Sequeira Freitas*)

“Ho aula prátika, ita fiar katak iha duni oportunidade ba estudante sira atu esplora sira-nia kapasidade, dezenvolve sira-nia abilidade no hamosu inovasaun iha sira atu deskobre no intende segredu siénsia nian. Nune’e de’it mak métodu ida-ne’e sempre asume papel importante hodi kontribui ba melloramentu kualidade ensinu aprendizajen iha ita-nia rai doben Timor-Leste no halo ita-nia aula sai diferesa”. 

Maneira ne’ebé profesór ida bele uza atu ninia aula la’o ho di’ak no efetivu, efisiente iha sala de aula mak profesór ne’e rasik presiza eskolla métodu ensinu ida-ne’ebé tuir duni kondisaun alunu sira-nian.

Métodu ensinu barbarak mak dezenvolvidu tebes ona hosi matenek-na’in sira edukasaun nian, no métodu di’ak ida hosi métodu barbarak ne’ebé bele utiliza iha paradigma foun eskola ativu daudaun ne’e mak aula prátika ka métodu ensinu prátika ne’ebé bele utiliza ba aula sira siénsia no matemátika nian, tantu iha siklu datoluk ensinu báziku nian komu iha ensinu sekundáriu jerál sira.

Daudaun ne’e, esforsu lubuk ida mak edukasaun Timor-Leste halo hodi bele introdús aula prátika iha eskola sira iha teritóriu laran tomak. Embora profesór no estudante sira hosi eskola barbarak iha Timor-Leste haklalak no halerik kona-ba ekipamentu laboratóriu ne’ebé bele dehan sei ki’ak tebetebes iha ita-nia rain. Maibé, bainhira profesór ida kreativu mak la presiza depende totál ba ekipamentu laboratóriu modernu atu bele hala’o prátika ba ninia aula. Basta sasán utilizadu sira balu iha no profesór no estudante sira iha neon badaen hodi nakfilak sasán resta sira-ne’e ba ekipamentu prátika nian mak ida-ne’e mós bele tulun ona atu bele realiza aula prátika iha ita-nia eskola.

Kreatividade atu nakfilak sasán no materiál restu sira-ne’ebé ema la utiliza ona (bele dehan sai ona lixu) hodi sai fali materiál útil ba aula prátika, dezenvolve ona hosi ekipa Sentru Estudu Siénsia no Matemátika (SESIM) ne’ebé harii hosi profesór timoroan lubuk ida hamutuk ho mestre boot Curt Gabrielson iha tinan hirak liu ba kotuk. Sira konsege dezenvolve kreatividade ida-ne’e ho di’ak no oras ne’e sira-nia atividade hetan avansu ne’ebé di’ak no pozitivu loos iha Timor-Leste. Profesór no estudante (iha nível ensinu hotu-hotu iha Timor-leste) lubuk boot ida mak sai ona benefisiáriu ba formasaun oioin iha área siénsia no matemátika hosi ekipa SESIM.

La’ós ida-ne’e de’it. Ekipa SESIM ne’ebé integra aan ona ho UNESCO liuhosi Komisaun Nasionál Timor-Leste ba UNESCO (KNTLU) ida-ne’e mós dezde 2013 hala’o ona konkursu ka kompetisaun akadémiku liuhosi hakerek tópiku sira prátika nian hodi bele hasa’e liután kreatividade no inovativu hosi profesór no estudante sira iha área siénsia no matemátika nian. Esforsu sira-ne’e hotu, nu’udar pasu pozitivu hodi provoka, motiva no hamanas liután espíritu eskola sira-nian atu tau importánsia ba iha aula prátika.

Tuir paradigma foun edukasaun ohin loron nian, atividade aula nian hotu-hotu tenke konsentra iha estudante sira ka bele dehan estudante sira mak sai sentru ba atividade ensinu aprendizajen. Oinsá mak estudante sira bele sai sentru ba atividade ensinu aprendizajen se profesór sira kontinua utiliza métodu esplikativu ka palestra iha ninia métodu? Estudante sira mak sai sentru ba prosesu ensinu aprendizajen ne’e katak estudante sira mak tenke ativu liu, sira rasik mak tenke buka hatene no deskobre liuhosi kaer rasik ho liman no rezolve rasik problema sira-ne’ebé sira hasoru. Iha atividade ensinu aprendizajen ida hanesan ne’e, profesór sira sai de’it ona fasilitadór hodi fasilita estudante sira ho koñesimentu oituan ne’ebé sira iha no barak liu ne’e estudante sira mak ativu mesak hodi buka hatene mesak. 

Oras ne’e, ita hotu tenke tau ona iha ita-nia nosaun katak atu ita-nia aula ne’e bele fó rezultadu di’ak no efetivu mak ita tenke muda ona ita-nia métodu ensinu tuir paradigma foun edukasaun universál nian. Atu dehan susesu hosi ita-nia sistema edukasaun labele hasees hosi prosesu ensinu aprendizajen ida-ne’ebé ninia implementasaun tenke referidu ba aprendizajen ativu no sentralizadu ba iha estudante sira tuir ezijénsia paradigma foun edukasaun mundu ohin loron nian.

Saida mak aula prátika tuir pontu de-vista akadémiku?

Métodu ensinu katak planu ida ka buat ne’ebé utilizadu nu’udar matadalan iha planeamentu ba ensinu aprendizajen iha sala de aula ka ensinu aprendizajen ne’ebé ita sei uza iha ita-nia aula. Inkluindu iha laran objetivu hosi prosesu ensinu aprendizajen ne’e rasik, etapa sira hosi ita-nia atividade ensinu no aprendizajen, ambiente hosi ita-nia atividade no oinsá ita jere ita-nia sala de aula. Hosi ne’e ita bele haree katak métodu ensinu ne’e la’ós buat ketak ka mamuk ida maibé nu’udar matadalan kompletu ida-ne’ebé sei lori ita ba hetan rezultadu di’ak iha ita-nia atividade ensinu aprendizajen.

Bele dehan, profesór sira-ne’ebé prepara sira-nia métodu ensinu katak planu ensinu mak profesór sira-ne’ebé hakarak tebes atu ninia atividade ensinu aprendizajen bele lori nia hetan rezultadu ida di’ak, katak bele atinje metas sira ne’ebé konteúdu ida ezije atu ita bele atinje.

Etimolójikamente, liafuan prátika deriva hosi liafuan gregu “praktike” ke signifika ativu ho sentidu laboriozu katak halo serbisu ho maneira intensa. Tuir disionáriu online portugés, liafuan prática significa “o que se opõe ao teórico”. Ka iha Kamus Besar Bahasa Indonesia, praktikum signifika “bagian dari pengajaran yang bertujuan agar siswa mendapat kesempatan untuk menguji dan melaksanakan dari keadaan nyata apa yang diperoleh dari teori”.

Tuir Soekarno et al. (1990, p. 14) haktuir katak métodu prátika nu’udar maneira hanorin ida ne’ebé fó oportunidade ba estudante sira atu deskobre fatu ka realidade ruma ne’ebé nesesita atu sira hatene. Enkuantu Djamarah no Zain (2002, p. 95) fó difinisaun katak métodu prátika nu’udar prosesu aprendizajen iha ne’ebé estudante sira halo no sente mesak, tuir prosesu, observa objetu, halo análize, fó prova no halo konkluzaun ba objetu ruma, kondisaun no prosesu hosi matéria ne’ebé sira estuda kona-ba fenómenu natureza no ninia interasaun sira, nune’e bele responde pergunta sira ne’ebé sira hetan liu-hosi observasaun induktivu (katak halo análize bazea ba fatu ka realidade ruma). 

Aula prátika katak maneira aprezentasaun konteúdu sira iha sala de aula iha ne’ebé iha oportunidade ba estudante sira atu dezenvolve sira-nia kriatividade no talentu sira nu’udar results ka rezultadu hosi prestasaun estudu ne’ebé estudante sira hetan tiha ona iha aula sira anteriór nian hodi atinje objetivu ka metas aprendizajen nian. Tuir Hegarty-Hazel in Lazarowitz no Tamir (1994) difine aula prátika nu’udar forma serbisu prátika ne’ebé hola fatin iha ambiente ne’ebé kondisiona ho objetivu aprendizajen atu estudante sira envolve direta iha esperiénsia estudu nian ne’ebé planeadu no iha interasaun ho ekipamentu sira atu observa no komprende ka intende rasik fenómenu sira ne’ebé mosu durante atividade prátika nia laran.

Métodu prátika ne’e hanaran mós ho métodu laboratoriál katak liuhosi laboratóriu (bele moderna bele mós instala rasik ho sasan dezutilizadu sira), profesór sira uza objetu oioin, ajuda ka fasilita estudante sira hala’o ka realiza esperimentu oioin. Métodu laboratoriál ka prátika hala’o depoizde profesór fó orientasaun ruma ka maneira oinsá bele halo prátika. Atividade ida ne’e hala’o ho forma prátika hodi utiliza ekipamentu ruma, iha kazu ida ne’e profesór sira treina daudaun kriatividade hosi estudante sira hodi utiliza ho efetivu ekipamentu sira-ne’ebé oferese ba sira (bele mós sira prepara rasik) no rezultadu ne’ebé sira hetan durante atividade prátika.

Dezde science experimental mosu iha sékulu 16, atividade prátika ka bele dehan esperiénsia empírika hetan konkordánsia entre sientista sira nu’udar atividade prinsipál sientista sira-nian. Ho nune’e, iha konviksaun katak atu eduka kada jerasaun ida iha siénsia mak estudante idaidak ezijidu atu estuda siénsia hanesan mós ho ida ne’ebé sientista sira halo uluk tiha ona iha tempu sira uluk. Vizaun aprendizajen siénsia hanesan ne’e tuir profesór maioria nia hanoin katak sai nu’udar atividade aprendizajen ida efetivu liu tanba estudante sira envolve diretamente iha atividade prátika nia laran.

Atividade prátika sai tiha ona karater aprendizajen ba siénsia no matemátika ne’ebé koñesidu iha eskola sira iha mundu dezde fín hosi sékulu 19. Iha momentu ne’ebá siénsia sai tiha ona parte integradu hosi estrutura kurríkulu eskola sira nian iha nasaun barbarak. Bainhira atividade prátika introduzidu (aprezenta) ba dahuluk iha kurríkulu eskola nian, ho ninia atividade ensinu aprendizajen ne’ebé variável, la iha kualker eskola ida mak rejeita iha altura ne’ebá. Tuir Jenkins no Whitfield (1974) haktuir katak atu utiliza métodu ensinu sa’ida de’it mós, importante liu mak tenke tetu katak atividade prátika nesesita ka presiza hala’o hosi estudante sira no atividade prátika ida-ne’e nu’udar karáter ne’ebé koñesidu liu iha edukasaun siénsia nian iha Reinu Unidu.

Papel aula prátika nu’udar instrumentu atu estuda inkuiri (tipu atividade aprendizajen ne’ebé envolve ho másimu kapasidade hosi estudante sira-nian atu buka hatene no observa ho sistemátikamente, krítiku, analítiku no lójika) no estuda kognitivu (tipu atividade aprendizajen ne’ebé importa liu prosesu aprendizajen duké rezultadu hosi estuda ne’e rasik) la’ós ona buat foun ida. Papel hosi aula prátika ne’e rasik koñesidu ona iha fín hosi sékulu 19, iha momentu Henry Edward Armstrong hahu atividade inkuiri iha prosesu aprendizajen Kímika no ida ne’e koñesidu ho mátodu eurístiku (euristic method) ka arte ida ne’ebé halo estudante sira deskobre buat ruma ba sira-nia aan rasik. Jean_Jacques Rousseau (1712-1788) iha ninia pensamentu edukativu nian dehan nune’e: “Let him know nothing because you have taught him, but because he has learnt it for himself”. Rousseau nia pensamentu ida ne’e atu dehan katak bainhira estudante sira estuda mesak, observa mesak, deskobre mesak liu hosi kaer no haree rasik, mak sira sei hatene di’ak liu kompara ho bainhira professor sira mak esplika buat hotu-hotu!

Objetivu hosi aula prátika

Atividade prátika iha ensinu aprendizajen iha ninia objetivu prinsipál tolu (3) mak abilidade kognitivu, abilidade afetivu no abilidade psikomotóriku. Iha abilidade kognitivu, estudante sira bele treinu sira-nia aan atu bele intende teoria sira ne’ebé sira aprende, teoria ne’ebé kontradíz karik bele integra ho di’ak no bele implementa ka aplika teoria hirak ne’e iha kondisaun reál.

Abilidade afetivu ho objetivu atu estudante sira bele aprende halo planeamentu atividade ho independentemente ka serbisu hamutuk, respeita no komunika informasaun kona-ba ninia área estudu rasik (pur ezemplu biolojia, ka kímika ka área siénsia sira seluk). Enkuantu abilidade psikomotóriku ho objetivu atu prepara ekipamentu sira, hatene instala no utiliza sasan ka materiál sira tuir ninia nesesidade.

Tuir Henrique Cezar Ferreira (2015) haktuir katak objetivu prinsipál hosi aula prátika mak atu dezenvolve kapasidade halo observasaun, analiza no kompreensaun ba sistema kontrolu nian. Nu’udar métodu ida hosi prosesu aprendizajen, aula prátika fó espetativa katak estudante sira bele mellora ka hadi’a sira-nia abilidade hodi nakloke ho forma klara, objetividade no presiza serbisu ne’ebé realiza iha esperiénsia sira liuhosi meiu elaborasaun pré–relatóriu no relatóriu sira.

Tuir Yeni Suryaningsih (2017, p. 53) klarifika katak aula prátika bele garante konteúdu hosi prosesu aprendizajen ida. Signigfika katak ho aula prátika estudante sira iha oportunidade atu deskobre no fó prova ba teoria sira. Ho nune’e, aula prátika bele garante boa entendimento hosi estudante sira ba iha matéria aprendizajen nian. Prátika fó oportunidade ba estudante sira atu prova teoria, deskobre teoria no klarifika teoria. Hosi atividade hirak prátika nian mak estudante sira sei intende didi’ak konteúdu hosi dixiplina ruma ne’ebé bele rasionaliza ho sira-nia koñesimentu.

Konseitu no prinsipiu balu hosi estuda siénsia no matemátika bele forma liu hosi prosesu kolokasaun ka jeneralizasaun hosi fatu ka realidade ne’ebé observadu iha atividade prátika. Atividade prátika mós bele forma ilustrasaun ba iha konseitu no prinsipiu hosi siénsia (biolojia, kímika, fízika no jeolojia) no matemátika ne’e rasik. Daudaun ne’e, ita rona barak liu slogan koñesidu iha dalen inglés ne’ebé dehan: I hear and I forget, I see and I remember, I do and I understand” katak ha’u rona no ha’u haluha, ha’u haree no ha’u lembra mas se ha’u halo mak ha’u sei kumpriende. Nu’udar hymne ka inu SESIM nian ne’ebé kompozita hosi mestre boot Curt Gabrielson hateten “kaer rasik, koko rasik, halo esperimentu no imi sei hatene”, indika katak estudante sira la’ós ona bidon mamuk ne’ebé presiza profesór sira mak kuru bee hodi enxe halo nakonu, lae! Estudante sira tenke envolve ativamente no sai sentru ba prosesu tomak ensinu aprendizajen nian, nune’e, ho sira nia envolvimentu ativa ne’e sira bele deskobre mesak segredu hosi siénsia ne’e rasik.

Lia maktaka

Woolnough no Allsop in Nuryani Rustaman (1995) aprezenta razaun haat (4) kona-ba importánsia hosi atividade prátika iha aula sira siénsia no matemátika nian. Akademista sira ne’e aprezenta katak razaun dahuluk kona-ba atividade prátika iha aula sira siénsia no matemátika nian mak atividade prátika bele hamoris motivasaun ba estuda (learning). Katak bainhira estudante sira deskobre rasik ona mak sira sei iha entuziasmu liu tan atu estuda nafatin atu bele responde pergunta no dúvida sira-ne’ebé sira iha kona-ba asuntu ruma. Razaun daruk mak atividade prátika bele dezenvolve abilidade báziku hodi halo experimentu. Iha realidade Timor-Leste nian, ho atividade kompetisaun hakerek tópiku ba prátika sira ne’ebé realiza hosi ekipa KNTLU-SESIM, hamosu ona estudante no profesór barbarak ho talentu no abilidade naturál hodi hamosu inovasaun oioin iha parte siénsia no matemátika (kestaun mak falta promosaun no ninia kontinuidade iha nível ensinu sira be aas liu).

Razaun datoluk mak dehan katak atividade prátika bele sai meius di’ak ida ba aprende abordajen sietífiku sira. Signifika katak estudante sira iha oportunidade atu halo atividade sientífiku sira ne’ebé uluk sientista sira halo hodi hamosu teoria oioin ne’ebé oras ne’e ita estuda hela. Ikus liu, razaun hosi atividade prátika mak bele garante matéria ba aprendizajen nian. Katak, estudante sira la’ós de’it estuda ema seluk nia teoria maibe hosi atividade prátika ne’ebé sira envolve ativamente, sira bele halo konkluzaun ruma ba teoria ne’e rasik. Aleinde razaun haat iha leten, atividade prátika iha aula sira siénsia no matemátika nian bele forma ilustrasaun ba iha konseitu no prinsipiu hosi siénsia ne’e rasik. Hosi atividade prátika hirak ne’e, ita bele halo konkluzaun katak prátika bele garante intendimentu estudante sira-nian ba iha matéria aprendizajen nian.

Oras ne’e, atividade prátika iha eskola lubuk ida la’o namanas liu hosi STEM FETO, Knua Prátika, Grupu Siénsia no selseluk tan nu’udar rezultadu hosi esforsu ne’ebé ekipa SESIM hahu tiha ona iha tinan hirak liu ba. Kompetisaun hakerek tópiku prátika nian mós realiza kada tinan hosi ekipa KNTLU-SESIM hodi fó oportunidade ba estudante no profesór sira hosi eskola hotu-hotu atu bele demonstra sira-nia kapasidade no abilidade iha área siénsia no matemátika. Ho aula prátika, ita fiar katak iha duni oportunidade ba estudante sira atu esplora sira-nia kapasidade, dezenvolve sira-nia abilidade no hamosu inovasaun iha sira atu deskobre no intende segredu siénsia nian. Nune’e duni mak métodu ida ne’e sempre asume papel importante hodi kontribui ba melloramentu kualidade ensinu aprendizajen iha ita-nia rai doben Timor-Leste no halo ita-nia aula sai diferente.

*) Hakerek na’in nu’udar profesór Ensinu Sekundáriu Públiku 12 de Novembru Becora no  hela iha Manleuana.

HAKEREK NO HATÁN

Please enter your comment!
Please enter your name here