Koordenadór nasionál TLCE, José Monteiro. Imajen/Tomé Amado

DILI,25 janeiru 2021 (TATOLI)—Timor Leste Coalition for Education (TLCE) liuhosi nia peskiza no monitorizasaun hahú hosi 2019-2020 haree hetan aspeitu tolu mak sei sai dezafiu ba kualidade edukasaun iha Timor-Leste (TL).

Koordenadór nasionál TLCE, José Monteiro temi aspeitu tolu ne’e mak hanesan, infraestrutura, kurríkulu no prosesu aprendizazen.

Notísia Relevante:MEJD sei reabilita edifísiu eskola 222 iha marsu

Ko’alia kona-bá kualidade edukasaun, presiza indikadór ne’ebé haree hosi prosesu no rezultadu. Maibé, ami haree hosi aspeitu infraestrutura, kurríkulu no prosesu aprendizazen iha eskola sira ne’ebé seidauk másimu. Tanba ne’e, ami konsidera aspeitu tolu ne’e sai dezafiu bo’ot atu garante kualidade,” José Monteiro hateten ba jornalista Agência Tatoli iha ninia serbisu fatin edifísiu TLCE Caicoli, seguda ne’e.

Hosi peskiza ne’e, TLCE deskobre katak, Governu mak la halo jestaun di’ak hodi investe makaas liuhosi Orsamentu Jerál Estadu (OJE) iha área edukasaun, kada tinan.

“Ministériu Eduakasaun Juventude no Desportu tenki iha jestaun di’ak atu jere. Tenki halo investimentu iha kurríkulu no prosesu aprendizazen, depois mak haree ninia rezultadu,” José Monteiro sujere.

TLCE nia haree katak, bainhira atu garante kualidade edukasaun, presija haree aspeitu infraestrutura iha eskola sira, biblioteka tenke tuir padraun katak, iha livru ba estudante no profesór sira.

Hosi peskiza TLCE nian ne’ebé halo iha tinan 2019 nota katak, progressu atu asesu iha nível edukasaun liuliu iha ensinu báziku terseiru síkulu, estudante ne’ebé abandona eskola pursentu 43, tanba sira la halo fali matrikulasaun foun iha nível ensinu sekundáriu.

Alende ne’e, TLCE mós haree hosi kualidade profesór sira nian mínimu tebes, kuaze pursentu 68 mak to’o oras ne’e seidauk domina lian portugés.

“Signifika, profesór sira ne’e la utiliza másimu lian portugués hodi hanorin estudante sira iha aula,”nia subliña.

Nune’e mós TLCE nia observasaun no peskiza iha tinan 2020, konsidera TL garante kualidade nível edukasaun, bazeia ba maioria estudante ne’ebé pasa iha ezame nasionál no lokál.

“Ne’e hatudu katak, estudante no profesór sira prienxe duni rekezitu, maibé iha nível nasionál de’it. Nível rejionál, TL la tama iha kategoria, tanba seidauk partisipa iha kompetisaun rejionál sira hodi hatudu ita nia kualidade,” José Monteiro esplika.

Tanba ne’e, TLCE fiar no iha esperansa katak, Orsamentu Jerál Estadu (OJE) 2021 ne’ebé Governu aloka ba Ministériu Edukasaun Juventude no Desportu (MEJD) ho montante millaun $111,5 sei tau prioridade makaas liutan ba aspeitu sira ne’ebé mensiona.

Notísia Relevante:MEJD sei rekruta profesór kontratadu 900-resin iha 2021

Jornalista: Tomé Amado

Editór: Cipriano Colo

1 KOMENTÁRIU

  1. Los duni husi aspetu tolu nee mk sai hanesan barometru hodi sukat ensinu ninia kualidade maibe tenki mos investe iha rekursu humanu liu husi formasaun continuo hodi nunee professor/a sira bele kreativu liu tan iha prosesu aprendizagen ida nebe mk interativu.

HAKEREK NO HATÁN

Please enter your comment!
Please enter your name here