ANPM atribui lisensa ambientál ba empreza, iha salaun MF, Aitarak-laran, segunda (27/01). Imajen TATOLI/Florêncio Miranda Ximenes

DILI, 25 janeiru 2021 (TATOLI)Autoridade Nasionál Petróleu no Minerál (ANPM) atribui lisensa ambientál empreza lima ne’ebé harii infraestutura postu abastamentu kombustível tanba tuir ona rekezitu ne’ebé mensiona iha dekretu lei númeru 5/2011.

Autoridade reguladór emite sertifikadu lisensa ambientál ba empreza lima kompostu husi kategoria A ba Kompañia Global Oil Stroge Terminal (MUL) limitada no kategoria B hanesan F-FDTL Home Base FFS ba konsumu rasik, Fecilia Unip Lda, Graca Silva Unipesoál.Lda no Risa Fuel Unip. Lda.

“Ami halo atribuisaun ba empreza sira ne’ebé mak halo atividade iha downstream, relativamente ba armazenamentu empreza sira ne’ebé halo atividade ba postu abastamentu kombustível hodi kompleta rekezitu konstrusaun ba fasilidade armazenamentu ne’e rasik,” Prezidente ANPM, Florentino Mateus Soares Ferreira, hateten hafoin seremónia atribuisaun lisensa ambientál, iha salaun Ministériu Finansa (MF), Aitarak-laran, segunda ne’e.

Biban ne’e, nia enkoraja empreza públika no setór privada sira hodi bele kumpre regra no prosedementu atu fasilita malu hodi hala’o atividade downstream.

“Ami la’ós hanesan barreira ka opozisaun ba empreza sira-nia negósiu, maibé ami mosu atu solusiona preokupasaun tomak no tékniku sira prontu atu ajuda prenxe rekezitu tuir lei ne’ebé hatuur ona,” nia hatutan.

ANPM apresia serbisu komisaun avaliadór  ne’ebé hetan sertifikadu apresiasaun no empreza sira ne’ebé hetan lisensa ambientál.

“Apresiasaun ne’ebé ami fó hanesan garantia ba negosianente liuhosi atividade hirak ne’ebé la fó impkatu ba komunidade tanba ita mai husi prosesu valida no rigorozu tuir prosedimentu no regra sira,” nia tenik.

Aleinde ne’e, ANPM mós atribui sertifikadu ba membru komisaun husi liña interministeriál, ne’ebé halo ona avaliasaun rigorozu  ba impaktu ambientál, deklarasaun ambientál no jestaun ambientál husi empreza sira ba projetu infraestrutura armajenamentu kombustível.

Liña ministeriál ne’e kompostu husi Ministériu Transporte no Komunikasaun, Ministériu Superiór Siensia no Kultura, Ministériu Turizmu, Komérsiu no Indústria, Ministériu Saúde, Ministériu Agrikultura no Peska, Ministériu Koordenadór Asuntu Ekonómiku, Ministériu Obra Públika, Ministériu Petróleu no Minerál, Sekretaria Estadu  Terra no Propriedade, Sekretaria Estadu Protesaun Sivíl, Sekretaria Estadu Formasaun Profisionál no Empregu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here