Koordenadór pilár hitu COVID-19, Nilton da Silva. Imajen/Felicidade Ximenes.

DILI,24 janeiru 2021 (TATOLI)— Ministériu Saúde (MS) detekta tan sidadaun estranjeiru na’in tolu pozitivu COVID-19, iha auto-kuarentena otél Timor Resort no trasporta ona ba iha sala izolamentu Vera Cruz.

Sidadaun estranjeiru na’in-tolu ne’e aumenta tan ho na’in 14 ne’ebé antes ne’e baixa ona iha sentru izolamentu Vera Cruz, hamutuk na’in 17.

Notísia Relevante:MS anunsia sidadaun 11 pozitivu COVID-19, re-integra tolu

”Ohin 24 janeiru 2021, Ministériu Saúde atualiza tan konfirmadu foun na’in tolu COVID-19. Sira na’in tolu ne’e mesak Brazileiru, kompostu husi feto ida idade 45 no mane na’in rua, ida idade 48 no ida seluk idade 16 ne’ebé asintomátiku. Agora  ita izola ona iha sentru izolamentu Vera Cruz,’’ Koordenadór pilár hitu COVID-19, médiku Nilton da Silva hateten liuhosi konferénsia imprensa iha salaun MS, Caicoli, domingu ne’e.

Médiku ne’e esplika, na’in tolu ne’e familia ida kompostu hosi inan, aman no oan, ne’ebé sai hosi Brazíl mai Indonézia no iha kuarta 20 janeiru hosi Atambua tama mai Timor-Leste liuhosi fronteira Batugade ho grupu ida-ne’ebé hamutuk ema na’in 118.

Durante iha Dili, nia hatutan, família ne’e submete ba auto-kuarentena iha otél Timor Resort, hamutuk tan ho sidadaun estranjeiru na’in rua, ne’ebé sira nia teste swab ka amostra foti iha 22 janeiru no rezultadu na’in-tolu pozitivu, na’in rua seluk negativu.

”Informasaun ne’ebé mak ita rekolla hosi ita-nia maluk sira vizilánsia epidemolojia katak, entre família ne’e, ida serbisu iha Governu tanba Governu mak kontrata,’’ Koordenador pilár hitu COVID-19, Nilton da Silva subliña.

Entretantu, dadus ba loron 24 janeiru 2021, kazu komulativu 67, kazu foun tolu no atuál baixa 17.

Notísia Relevante:Governu autoriza pasajeiru 118 tama hosi fronteira Batugade

Jornalista: Felicidade Ximenes

Editór: Cipriano Colo

1 KOMENTÁRIU

  1. Timor oan termina kursu oioin ho experiensia nb naton hd serbi rai TL tmb sd mk governu tenki ariska tan Rai dbn Ida n ho kazus importadus hs ema estranjeirus?
    Sera que sidadaun Timor-oan sr nb mai hamotuk ho ema estranjeirus sr n livre hs Covid-19? Tmb sr tama mai TL hamotuk!

HAKEREK NO HATÁN

Please enter your comment!
Please enter your name here