Sarani sira partisipa selebrasaun misa iha Igreja Santo António Motael, domingu (24/01). Imajen TATOLI/Antónia Gusmão

DILI, 24 janeiru 2021 (TATOLI)—Durante selebrasaun misa domingu, baibain tempu komun ba dala-III,  iha Parokia Santo António Motael, Padre Guilhermino da Silva, hamutuk ho sarani sira kontinua reza ba ema hotu ne’ebé oras ne’e daudaun sofre moras COVID-19, iha mundu liuliu iha Timor-Leste.

Orasaun espesiál ne’e paroku hamutuk ho sarani sira hato’o iha parte Anamnese Eukaristia nian, liuliu iha Orasaun fiar na’in sira (Oração dos Fiéis), atu Maromak haraik bensaun ba ema hirak ne’e no fó esperansa nafatin ba sira.

“Ita hasa’e orasaun no reza ba ita-nia maluk sira ne’ebé daudaun ne’e moras, liuliu hirak ne’ebé moras tanba COVID-19. Husu Maromak atu hasai moras ne’e hosi sira-nia isin, no fó fali saúde di’ak ba sira. Ita reza mós ba sira ne’ebé mate tanba vírus ne’e, husu Maromak atu simu sira iha Reinu Lalehan,” Padre Guilhermino da Silva temi iha orasaun.

Selebrasaun misa ohin iha Igreja Motael, partisipa másimu hosi sarani sira, ne’ebé disiplina tebes hodi kumpre protokolu saúde públika hanesan, uza máskra, fase liman iha fatin ne’ebé prepara ona, no halo distansiamentu  fíziku.

Misa prezensiál ne’e reativa filafali, hafoin Governu liuhosi reuniaun Konsellu Ministru (KM) estraordinária halo revogasaun ba Dekretu Governu númeru 21/2020 loron 30 dezembru, tanba haree katak iha novidade di’ak ba rekuperasaun infetadu COVID-19 no laiha kazu transmisaun komunitária iha territóriu.

Aleinde ne’e, Arkedioseze Metropolitana Dili mós fó sai ona nota imprensa ne’ebé publika iha loron tersa (19/01) hodi autoriza selebrasaun misa prezensiál iha Igreja sira importante mak obedese ba protokolu Ministériu Saúde (MS) no Organizasaun Mundiál Saúde (OMS).

Selebrasaun eukaristia iha Igreja Motael ne’e nu’udar selebrasaun dahuluk iha tinan 2021 nian, ne’ebé fahe ba parte tolu, parte dadeer misa rua iha tuku 07:00 no tuku 08:30 no lorokraik tuku 16:00.

Tuir oráriu, iha domingu baibain tempu Komun ba dala-IV iha semana oin, Parokia Motael sei kontinua ho selebrasaun misa prezensiál  ho oras ne’ebé hanesan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here