Ekipa Karketu Dili FC. Imajen/Mídia LFA

DILI, 24 janeiru 2021 (TATOLI) – Estrutura klube Karketu Dili FC, sábadu ne’e, iha Dili, realiza kongresu hodi hili estrutura foun ba períodu tinan-rua (2021-2023). Hosi kongresu ne’e  hili Adilson Ribeiro ba prezidente no Elizeu Isaac, sekretáriu jerál.

“Ami kada tinan-rua sempre halo eleisaun liuhosi kongresu hodi hili estrutura foun no membru sira. Nune’e, sábadu ne’e, hili Adilson ba prezidente nafatin durante tinan-rua no ha’u rasik hanesan Sekretáriu Jerál,” Elizeu Isaac, informa  ba Agéncia TATOLI via WhatsApp, domingu ne’e.

Nia esplika, kongresu ne’e hala’o bazeia ba estatutu klube nian hodi fó hanoin ba malu no kompleta malu, oinsá bele lori klube ba oin ho professional liután.

Kongresu durante loron ida, halo mós alterasaun ba estutu iha artigu balu, nune’e hodi kompleta liután saida mak klube presiza.

“Estrutura la’o loos ona, ami sei tur hamutuk fila fali oinsá iha semana ne’e nia laran bele bolu jogadór sira hodi tur hamutuk hodi prepara ekipa atu hasoru époka 2021 nian,” Elizeu Isaac hateten.

Kona-ba jogadór Karketu halo negosiasaun ona ho jogadór foun na’in-ualu (8) kompostu hosi estranjeiru no lokál, maibé sei konfidensiál.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here