Konstrusaun edifisiu iha Kampus Caicoli, ne’ebé média UNTL hasai imajen ne’e iha 10 novembru 2020, bainhira foin atinji pursentu 51.

DILI,22 janeiru 2020 (TATOLI)—Universidade Nasionál Timor Lorosa’e (UNTL) sei finaliza tan edifísiu foun tolu ho sala-de-aula hamutuk 36.

Sala-de-aula sira ne’e, tuir planu, sei entrega ba Fakuldade Medisina, Siénsia no Saúde (FMSS) no Fakuldade Ekonomia no Jestaun (FEJ).

Notísia Relevante:UNTL sei sosa kadeira 10.000 ba sala-de-aula 137

“Edifísiu ne’e bele utiliza mós husi fakuldade sira seluk kuandu presiza. Presiza de’it mak halo jestaun ida di’ak,” Diretora Lojístika no Manutensaun, UNTL, Fátima Odete da Cruz Monteiro hateten ba Agência TATOLI via telefónika, sesta ne’e.

Kona-ba jestaun, tuir ezekutiva ne’e katak, depende ba oráriu fakuldade nian.

“Ita hatene edifísiu foun ne’ebé atu entrega bá fakuldade medisina ne’e besik-malu ho fakuldade siénsia sosiál, karik parte medisina laiha aula bele fó siénsia sosiál atu utiliza, naran katak koordenasaun oráriu ne’e mak importante,” nia reforsa.

Konstrusaun ba edifísiu foun tolu ne’e hahú ona iha outubru 2019 no tuir planu sei finaliza iha fevereiru 2021.

Kompañia Aitula, Lda mak konstruidór ba konstrusaun iha Kampus Sentrál no FEJ nian, entretantu Kompañia Lienier Unipesoal, Lda mak sai responsável ba edifísiu FMSS nian iha Kampus Caicoli.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here