Primeiru-Ministru, Taur Matan Ruak, akompañadu ho ninia espoza, Isabel da Costa Ferreira, vizita matebian Deputadu Sabino Soares ‘Guntur’ momentu baixa iha HNGV iha domingu (10/01). Imajen/Mídia GPM

DILI, 23 janeiru 2021( TATOLI)—Primeiru-Ministru (PM), Taur Matan Ruak, hamutuk ho ninia espoza, Isabel da Costa Ferreira, hato’o sentidu kondolénsia kle’an ba família, amigu no família boot Partidu Libertasaun Popular (PLP), ba falesimentu Deputadu, Sabino Soares ‘Guntur’, ne’ebé hakotu iis iha sábadu madrugada tuku 04:00, iha Hospital Nacional Guido Valadares (HNGV), tanba moras diabetes.

“Korajen ba matebian nia espoza no oan kiak sira iha momentu lutu ne’e. Deskansa iha hakmatek rohan la’ek belun, no korajen ba família no oan kiak sira iha momentu susar ida ne’e,” refere nota impresa ne’ebé Agência TATOLI asesu, iha sábadu ne’e.

Notísia relevante: Deputadu ‘Guntur’ hakotu iis tanba diabetes

Iha loron 10 janeiru ne’e, PM Taur akompañadu ho ninia espoza, Isabel da Costa Ferreira, vizita Deputadu Guntur, ne’ebé tempu ne’ebá baixa hela HNGV, hodi fó korajen ba matebian.

Guntur sai hanesan membru Parlamentu Nasionál (PN), ne’ebé eleitu hosi Partidu Libertasaun Populár (PLP).

Maski médiku sira no família esforsu maka’as ba nia atubele rekopera, maibé la konsege salva tanba nia moras diabetes inklui sofre pulmaun bubu.

Matebian konsege baixa iha Intensive Care Unit (ICU) no halo tratamentu durante semana ida molok hakotu iis.

Tuir planu, iha segunda (25/01) Parlamentu Nasionál sei konvoka plenária exraordinária hodi fó omajen ikus ba Deputadu Guntur, hafoin halo prosesu funebre.

Matebian moris iha loron 08 jullu 1975, iha suku Lelalai Makoloso, postu administrativu Quelicai, munisípiu Baucau.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here