Arguidu sira partisipa iha julgamentu iha TDD. Imajen Tatoli/Nelson de Sousa

DILI, 23 janeiru 2021 (TATOLI)-Tribunál Distritál Dili (TDD), liuhosi desizaun julgamentu primeiru interrogatóriu, sábadu ne’e, aplika medida aprezentasaun periódika no termu identidade rezidénsia (TIR) ba arguidu na’in-10 ne’ebé deskonfia envolve iha kazu fa’an rai Estadu iha Aldeia Lesibutak, Suku Manleuana, Postu Administrativu Don Aleixo, Munisípiu Dili.

Arguidu na’in haat (4) maka Tribunál aplika medida aprezentasaun periódika ho inisiál RM nu’udar Diretór Jerál Diresaun Nasionál Terras no Propriedade (DNTP), JGB, MB, MB no arguidu na’in-neen (6) seluk mak Tribunál aplika TIR ho inisiál MB, EB, JTS, AG, PMA, OT.

Notísia Relevante : Kazu fa’an rai, arguidu sira submete primeiru interrogatóriu

Iha alegasaun Ministériu Públiku (MP) husu Tribunál atu aplika prizaun preventiva ba arguidu na’in-haat, maibé parte defeza husu aplika medida aprezentasaun periódika no TIR.

Ministériu Públiku nu’udar na’in ba asaun penál akuza arguidu sira ho krime abuzu podér, danu agravadu, falsifikasaun dokumentu ka anotasaun téknika, falsifikasaun agravadu no korrupsaun pasiva ba aktu ilísitu ne’ebé previstu no punido iha artigu 297, 259,303, 304 no 293 hotu-hotu hosi Kódigu  Penál Timor-Leste.

Tribunál aplika de’it medida aprezentasaun periódika no termu identidade rezidénsia (TIR) tanba iha primeiru interrogatóriu medida koasaun faktu hotu ne’ebé mak MP promove ka alega ba iha Tribunál laiha indísiu forte kona-ba envolvimentu arguidu sira nian iha kazu ne’e.

Advogadu privadu, Câncio Freitas ne’ebé fó asisténsia legál ba arguidu RM hateten desizaun Tribunál ne’e adekuadu tanba Tribunál nia konviksaun katak indísiu ka faktu sira ne’ebé iha seidauk sufisiente tanba ne’e Ministériu Públiku nia promosaun la prienxe rekizitu.

Notísia Relevante : Fa’an rai, SIKN detein autoridade Suku Manleuana

Nia hatutan, desizaun Tribunál ne’e mós kona-ba objetu ka sasán sira ne’ebé antes ne’e parte autoridade polísia halo apreensaun arguidu sira nian sei devolve hotu tanba la’ós objetu krime.

Advogadu privadu, Fernando da Costa, ne’ebé fó asisténsia ba arguidu JTS nu’udar Xefe Suku Manleuana konkorda ho desizaun Tribunál nian.

Ba arguidu ne’ebé Tribunál aplika medida aprezentasaun periódika sei aprezenta aan ba iha Tribunál kada fulan no ba arguidu sira ne’ebé hetan TIR sei la aprezenta aan no hein de’it iha prosesu julgamentu komún tuir mai mak partisipa.

Tribunál husu arguidu sira atu koopera nafatin ho parte justisa tanba prosesu ne’e arguidu sira sei inosente no parte MP sei kontinua rekolla prova sira hodi aprezenta ba Tribunál iha julgamentu komún iha tempu tuir mai.

Prosesu primeiru interrogatóriu ne’e prezide hosi juis Ivan Suritai, Ministériu Públiku reprezenta hosi prokuradór Matias Soares no arguidu sira hetan asisténsia legál hosi advogadu privadu, Fernando da Costa, Câncio Freitas ho defensór públiku na’in-rua.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here