Atividade iha Aeroportu Internasionál Nicolau Lobato, Comoro, Dili, kuarta (02/12).Imajen TATOLI/António Gonçalves

Dili, 23 fevereiru 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, reprezenta Governu nu’udar Ministru Defeza ein-ezersísiu, partisipa iha audiénsia ho Komisaun B (Negósius Estranjeiru,  Defeza no Seguransa) Parlamentu Nasionál (PN), hodi diskute proposta ratifikasaun akordu servisu aéreu sira entre Governu Timor-Leste no Austrália.

Antes ne’e, akordu servisu aéreu asina ona hosi país rua ne’e iha tinan 2017 no ratifika ona hosi Parlamentu Austrália, maibé Timor-Leste seidauk.

“Akordu ne’e bazeia ba nasaun rua nia hakarak atu promove sistema aviasaun internasionál ne’ebé iha konkorrénsia entre empreza transporte aéreu sira iha merkadu, ho servisu sira ne’ebé kompetitivu, inovadór no seguru,” refere nota imprensa ne’ebé Agência TATOLI asesu, sábadu ne’e.

Notísia relevante: Governu Aprova Proposta Ratifikasaun Akordu Servisu Aéreu Entre Timor-Leste no Austrália

Akordu ne’e ho objetivu atu asegura nível másimu seguransa no protesaun internasionál, hodi afirma filafali preokupasaun séria kona-ba aktu no ameasa sira kontra seguransa aeronave nian.

Ho ratifikasaun akordu, kompañia aérea sira sei bele tama iha espasu aéreu nasaun rua, ne’ebé la presiza autorizasaun prévia, bainhira kumpre ona rekizitu regulamentár sira inklui kona-ba seguransa no sei permite hasa’e konkorrénsia, ne’ebé bele hamenus folin billete no transporte merkadoria.

Iha audiénsia ne’e, Ministru hatán ba preokupasaun membru Komisaun B no hateten katak Ministériu Defeza laiha kualkér objesaun kona-ba ratifikasaun akordu ne’e no defende vantajen hosi ratifikasaun.

Diskusaun ne’ebé realiza iha sala komisaun B PN, partisipa hosi ekipa Ministériu Negósiu Estranjeiru, Ministériu Transportes no Komunikasoins, Autoridade Nasionál Aviasaun Sivíl Timor-Leste (AACTL, sigla portugés) no Administrasaun Aeroportu no Navegasaun Aérea Timor-Leste (ANATL) inklui Ministériu Interiór.

Antes ne’e, iha loron 22 jullu 2020, liuhosi reuniaun Konsellu Ministru, Governu aprova projetu proposta rezolusaun ne’ebé aprezenta hosi Ministra Negósiu Estranjeiru no Kooperasaun, Adaljiza Magno, kona-ba ratifikasaun akordu servisu aéreu entre Govenu Timor-Leste no Governu Austrália.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here