Diretór eskola Ensinu Sekundáriu Jerál Públiku 4 setembru Liceu, Viqueque, Veríssimo Marques. Imajen/facebook

DILI, 22 janeiru 2021 (TATOLI)— Dirijente eskola Ensinu Sekundáriu Jerál Públiku (ESGP, sígla portugés) 4 setembru Liceu, Viqueque, hamutuk ho parte família rezolve ona violénsia hasoru estudante foun durante prossesu orientasaun, iha eskola ne’e.

Diretór Eskola, Veríssimo Marques  esplika ba Agência Tatoli katak, hafoin akontesimentu no virál kedan iha mídia sosiál facebook, eskola foti kedan medida hodi bolu estudante ne’ebé envolve iha akontesimentu ne’e, hamutuk ho aman-inan, hodi rezolve internalmente nu’udár família edukativa.

Notísia Relevante:MEJD investiga hela krime iha ESGP 4 setembru Viqueque

“Aman-inan hosi estudante foun ne’e sente ladún satisfás ho akontesimentu ida ne’e. Maibé, grasas a Deus, ami bele rezolve iha (19/01) no parte hotu-hotu simu-malu katak, ida ne’e nu’udár fallansu ida ne’ebé bele mosu iha atividade ida nia laran,” Diretór eskola hateten ba kontribuidór Agência Tatoli, via telefónika, kinta ne’e.

Dirijente eskola ne’e hatutan, rezultadu hosi soru-mutu ne’e, eskola hamutuk ho aman-inan hosi vítima, foti de’it medida preventiva atu evita hahalok hanesan ne’e, labele repete fila-fali iha futuru.

Alende ne’e, parte eskola ho aman-inan hosi vítima, asina hamutuk akta ida ne’ebé ho nia konteúdu parte rua konkorda atu rezolve de’it kazu ne’e familiarmente iha eskola no laiha parte ida mak sei levanta kazu ne’e ba oin tuir dalan justisa.

“Kazu ida ne’e rezolve ona entre aman-inan ho eskola liu hosi asinatura akta hamutuk no hein hela medida edukativa ne’ebé eskola sei foti liu hosi enkontru konsellu profesór,” nia subliña.

Diretór ho profesór sira sei bolu estudante hotu hosi eskola ne’e ho aman-inan atu esplika kona-ba kronolojia akontesimentu, liuliu atu haforsa nafatin konfiansa inan-aman no públiku ba eskola ne’e, tanba konsidera hanesan fallansu ida.

Kona-bá medida sansaun hasoru estudante tuan ne’ebé komete krime, diretór ne’e haktuir, parte eskola sei konvoka enkontru alargada ida ho Konsellu Profesór atu informa kazu ne’e ba sira no Konsellu Profesór mak iha kompeténsia aas liu, atu foti medida edukativa ruma.

Klarifikasaun

Veríssimo hakarak klarifika katak, loloos ne’e parte eskola la halo orientasaun hanesan baibain, maibé halo de’it programa treinu parada ka órden unidu ba estudante foun sira.

Maibé, iha treinu parada ida ne’e, Komisaun Organizadora fahe estudante foun ba grupu 20 resin, no kada grupu orienta hosi membru Komisaun Organizadora na’in rua to’o tolu.

“Iha treinu parada ida ne’e nia laran mak akontese kastigu-malu entre orientadór ho orientadu sira,” diretór eskola ne’e klarifika.

Tanba ne’e, entre alunu tuan ho alunu foun sira mak hanorin-malu kona-ba parada no estudante tuan ida ho inisiál JL fó kastigu ba estudante foun ida ho inisiál DNF to’o tanis, no ikus-mai virál tiha iha facebook.

Durante atividade ne’e hala’o, nia hatutan, hetan akompañamentu hosi profesór Roberto dos Santos nu’udár koordenadór ba Komisaun Organizadora hamutuk ho asuntu estudantíl.

“Situasaun ida ne’e mosu la planeadu no nu’udár fallansu hosi Komisaun Organizadora nian. Ami nia parte mós hakfodak bainhira kazu ne’e virál iha facebook no ema barak fó reasaun negativu oioin hasoru akontesimentu ida ne’e,” nia subliña.

Parte eskola mós deskobre katak, iha estudante ida hosi membru Komisaun Organizadora, liu-liu sira ne’ebé fó kastigu ba estudante foun ne’e mak tau vídeo ne’e iha ninia pájina  facebook.

Atensaun hosi MEJD

Veríssimo Marques mós informa katak, hafoin kazu ne’e mosu no virál iha média facebook Diretór Nasionál ida hosi Ministériu Edukasaun Juventude no Desportu (MEJD) to’o kedan iha eskola hodi buka hatene kona-ba motivu hosi akontesimentu ne’e.

Iha intervensaun, nia hatutan, reprezentante MEJD ne’e husu ba dirijente eskola atu buka rezolve lalais kazu refere no labele repete tan iha futuru.

“Reprezentante MEJD nian mai aperta ami iha eskola hodi buka solusaun lalais ba kazu ne’e no buka meiu atu hadi’a iha futuru, nune’e labele repete kazu hanesan,” diretór eskola ne’e haktuir.

Kona-bá ne’e, nia dehan, parte eskola informa ona ba MEJD katak, buat hotu rezolvidu no parte rua inklui família simu-malu ona.

Deskulpa no kompromisu hosi eskola

Diretór Verrísimo lori eskola nia naran, husu deskulpa ba públiku no apela atu lalika fahe tutan vídeo ne’e hodi evita komentáriu negativu sira hasoru eskola ne’e rasik, tanba buat hotu rezolvidu.

“Ema ne’ebé iha liu direitu atu levanta kazu ne’e ba oin mak aman-inan no família hosi estudante foun. Maibé kazu ne’e ita rezolve hotu ona,” nia informa.

Eskola mós iha ona kompromisu atu ba oin sempre kontrola orientasaun eskola nian, nune’e labele mosu tan situasaun hanesan ne’e ka piór liu fali ida ne’e.

Entretantu, iha tersa  (19/01), membru Parlamentu Nasionál (PN) mós levanta kazu ida ne’e iha plenária no husu ba MEJD atu halo regulamentu ida ne’ebé regula kona-ba natureza hosi orientasaun ba alunu foun iha eskola sira.

Notísia Relevante:PN husu MEJD hapara prátika orientasaun violénsia ba estudante foun

Kontribuidór: Memensio Sequeira Freitas

Editór: Cipriano Colo

HAKEREK NO HATÁN

Please enter your comment!
Please enter your name here