Reitór UNPAZ, Adolmando Soares Amaral. Imajen Tatoli/Eugénio Pereira

DILI, 22 janeiru 2021 (TATOLI)–Reitór Universidade da Paz (UNPAZ), Adolmando Soares Amaral dehan tinan 2021 ne’e sira oferese tan bolsa estudu haat ba ofisiál superiór Polísia Nasionál Timor-Leste (PNTL).

Reitór ne’e sente orgullu tebes, tanba Instituisaun PNTL kria kooperasaun di’ak ho UNPAZ hodi fó formasaun ba líder PNTL sira no foin primeiravez mós membru na’in-44 simu graduasaun Diploma Jestaun Ezekutiva Polísia (DIPJEP).

“Ba ofisiál polísia sira ne’ebé termina ona sira-nia estudu iha nível diploma III (D3), sira bele kontinua sira-nia estudu iha UNPAZ ho nível lisensiatura. Ba tinan ida-ne’e, UNPAZ oferese tan bolsa estudu haat ba Sentru Formasaun Polísia (CFP-sigla Portugeza) hanesan rua ba nível mestradu, no rua ba nível lisensiatura,” Reitór Adolmando informa durante serimónia graduasaun ba ofisiál superiór PNTL na’in-44 ho Diploma Jestaun Ezekutiva Polísia (DIPJEP), iha Sentru Formasaun Polísia, Comoro, Dili, sesta ne’e.

Lista naran ba kandidatu ofisiál PNTL sira ne’ebé hakarak eskola, parte Sentru Formasaun Polísia entrega ona ba UNPAZ hodi halo selesaun ba dokumentu hodi hili ema na’in haat mak sei hetan oportunidade hahú estudu.

Reitór ne’e hatutan bolsa estudu ne’ebé UNPAZ oferese ba PNTL limita de’it ba ema na’in haat, tanba UNPAZ moris dependénsia ba fundu hosi públiku.

Iha parte seluk, Reitór Adolmado konsidera graduasaun ba superiór PNTL 44 ho Diploma Jestaun Ezekutiva Polísia importante hodi lori PNTL akompaña prosesu dinámika edukasaun iha mundu, polísia tenke kapasita an hodi kontribui ba instituisaun PNTL.

“Ho graduasaun ne’e, ita adapta situasaun mundu hodi lori PNTL sai polísia profisionál no tuir mehi ne’ebé Oitavu Governu Konstitusionál tau ona iha programa atu dezenvolve PNTL,” nia hatete.

Tuir nia latak atu lori polísia sai profisionál la’ós de’it iha rekursu umanu, maibé presiza hadi’a moris sai di’ak no fasilidade servisu sira.

Adolmando tenik UNPAZ mós sei kontinua koopera ho instituisaun Estadu sira hodi kontribui rekursu umanu ba iha prosesu konstrusaun Estadu no governasaun di’ak.

Iha fatin hanesan, Komandante Sentru Formasaun Polísia (CFP), Superintendente Xefe, Arquimino Ramos hato’o agradese ba UNPAZ tanba kontribui ajuda PNTL.

“Agradese ba magnífiku reitór UNPAZ ne’ebé hola inisiativa di’ak ida hodi kria kooperasaun ho PNTL realiza formasaun ne’e,” nia agradese.

Nia akresenta, PNTL mós kria kooperasaun ho Institutu of Business (IOB) bá-oin sei  simu ofisiál PNTL hodi hala’o estudu iha área jestaun no área importante seluk tan.

Jornalista: Eugénio Pereira

Editór: Xisto Freitas

PUBLISIDADEiklan

HAKEREK NO HATÁN

Please enter your comment!
Please enter your name here