Segundu Komandante PNTL, Kamisáriu Mateus Fernandes. Imajen/Antonio Goncalves

DILI, 22 janeiru 2021 (TATOLI)–Durante tinan 19 nia laran, prosesu harii dame no harii Estadu, Timor-Leste hasoru dezafiu oin-oin, maibé Timor-Leste iha ambiente seguransa ne’ebe hakmatek, nakonu ho otimizmu no konfiansa hodi hakat ba futuru.

Segundu Komandante Jerál PNTL, Komisáriu Polisia, Meteus Fernandes dehan, situasaun seguransa ne’ebé hakmatek, konsidera nu’udar pasu boot ida hodi hakat ba prosesu dezenvolvimentu sosiál, ekonomia no polítika iha Timor-Leste.

Konta hosi tinan 2002 to’o agora, nia haktuir, Timor-Leste nia prezensa no lideransa iha nível globál hetan mós rekoñesimentu boot tebes hosi komunidade internasionál sira. Iha nível nasionál, Timor-Leste mak lidera grupu g7+ ka nasaun frájil no pós-konflitu ne’ebé hamutuk 20 hosi 2010-2014.

Nia hatutan, Timor-Leste nia lideransa ne’e hetan mós apoiu másimu hosi Prezidente RDTL, Parlamentu Nasionál, Primeiru-Ministru, Governu no komponente sosiedade sivíl hanesan kauza nasionál ida.

“Ho situasaun seguransa ne’ebé hakmatek ne’ebé kontribui hosi instituisaun PNTL no F-FDTL, ohin loron mundu internasionál liuhosi peskiza ida ho naran “The fund for peace” hosi universidade Pensylavania halo peskiza ba seguransa iha país frájil no Timor-Leste tuur iha klasifikasaun 132 hosi nasaun 178 hosi mundu,” Mateus informa.

“Peskiza ida ho naran “The Fund For Peace” hosi Universidade Pensylavania hodi sukat nasaun sira frájil iha mundu ho tipu (Fragile States Index), iha tinan 2005, pozisaun RDTL iha klasifikasaun (ranking) 132 hosi nasaun 178, Timor-Leste ho predikadu maiór (High Warning) hosi nasaun seluk iha mundu,” Meteus Fernandes hatutan liuhosi deskursu iha Sentru Formasaun Akademia Polísia, Comoro, sesta ne’e.

Nia esklarese, iha relatóriu anuál index (Human Development Index) hatudu katak Timor-Leste iha kategoria hanesan (Mediu Human Development Index).

Ho prestasaun ne’ebé hetan, nia hateten, PNTL kontinua kapasita rekursu membru sira atu servisu kumpre regra no lei sira inklui hasa’e rekursu umanu hodi prepara an hodi hola parte iha misaun dame Organizasaun Nasaun Unida (ONU).

Iha fatin hanesan, Eis Prezidente Repúblika, José Ramos Horta hato’o nia avaliasaun pesoál kona-ba progresu servisu PNTL ohin loron avansa tebes, maski sei falta ekipamentu servisu barak ne’ebé Governu presiza investe beibeik.

“Polisia ne’e importante tebes. Uluk ha’u sei prezidente ha’u dehan ba Primeiru-Ministru Xanana atu rezolve problema polísia inklui mós F-FDTL. Tanba ita tenke prepara an kaer ita-nia rai, bainhira forsa ONU retira hosi Timor-Leste,” Horta lembra.

Nia salienta, bainhira nia hetan fiar hodi reprezenta Sekretáriu Jerál ONU nu’udar Prezidente Komisaun Altu Nível ba Operasaun Pás ONU hodi avalia misaun polísia ONU iha nasaun pós-konflitu, Timor-Leste nian tama kategoria di’ak uitoan.

Tuir nia, timoroan tenke orgullu, mezmu foin ukun an tinan 20, servisu PNTL no F-FDTL di’akliu nasaun balun iha mundu ne’ebé Horta rasik vizita no haree direta sira-nia kondisaun mosu ho funu no violénsia oin-oin.

“Ha’u halo komparasaun de’it. Ha’u ba vizita ita-nia postu polísia sira iha Laklubar, Same, to’o agora komesa di’ak, mezmu sira iha difikuldade. Se ita kompara ho nasaun seluk iha Áfrika, Índia, Pakistaun, Bangladeza, no rai seluk iha Áfrika no rai Arabia ne’ebá, banhira ha’u hetan mandatu reprezenta Sekretáriu Jerál ONU no nu’udar Prezidente ba Komisaun Altu Nível ba Operasaun Pás ONU nian, ami halo avaliasaun, krítika no imazinasaun hodi hadi’a operasaun pás ONU nian iha mundu mosu problema oin-oin, buka atu rezolve,” nia haktuir.

Nia haklaken, iha kontestu seguransa Timor-Leste nian la presiza foti teoria oin-oin hosi nasaun seluk, importante hadi’a servisu PNTL no F-FDTL tuir kondisaun Timor-Leste nian.

Jornalista: Eugénio Pereira

Editór: Xisto Freitas

PUBLISIDADEiklan

HAKEREK NO HATÁN

Please enter your comment!
Please enter your name here