Ministra Negósiu estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 22 janeiru 2021 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa  Governu servisu maka’as atu lori Zacarias Albano asume Sekretáriu Ezekutivu CPLP (Comunidade dos Países da Língua Portuguesa).

“Ezekutivu CPLP nian sei hili bainhira simeira iha Angola, juñu mai ne’e. Se  konfirma Zacarias Albano sai Sekretáriu Ezekutivu entaun foin primeira vez Timor-Leste nia ema sai sekretáriu ezekutivu,” Ministra  Adaljiza  Magno hateten  ba Agéncia Tatoli, sesta ne’e  iha edifísiu Ministériu Finansas, Dili.

Eis Ministru Negosiu Estranjeiru no Kooperasau, Zacarias Albano da Costa. Imajen/Espesiál.

Nia dehan, parte Governu liuliu MNEK hein hela prezensa Zacarias Albano nian tanba daudauk ne’e sei iha estranjeiru.

“Agora ami hein hela tanba COVID-19 ne’e maka  Zacarias Albano seidauk mai. Ami nafatin hein hela para nia mai hodi ita prepara ba ita-nia prioridade Timor-Leste oinsá Zacarias bele susesu iha ninia papél hanesan sekretáriu ezekutivu CPLP,” nia hateten.

Nia hatutan, MNEK kontinua esforsu halo nafatin servisu hodi prepara polítika no MNEK mós haruka ona diplomata senior balu ba iha sekretariadu ezekutivu nian nune’e bele servisu hamutuk ho Zacarias Albano.

Reuniaun Konsellu Ministru CPLP

Ministra Adaljiza Magno,  informa 2021 sei iha reuniaun Konsellu Ministru ordináriu no extra-ordináriu no Timor-Leste sei tau prioridade liubá mobilidade hodi fasilita membru sira livre tránzitu.

“Kada tinan CPLP iha reuniaun Konsellu Ministru ordináriu no extra-ordináriu, maibé agora ne’e ita ko’alia ka reuniaun barak liu halo de’it hosi virtual. Ita-nia pontu importante ne’ebé sei ko’alia mak mobilidade atu fasilita ema livre tránzitu, liuliu ba estudante sira no ema sira ne’ebé presiza,” Ministra Adaljiza Magno hateten.

Jornalista   : Hortencio Sanchez

Editór        : Francisco Simões

  

HAKEREK NO HATÁN

Please enter your comment!
Please enter your name here