Sekretáriu Estadu Kooperativa, Elizário Ferreira. Imajen TATOLI/António Gonçalves

BAUCAU, 22 janeiru 2021 (TATOLI)–Sekretáriu Estadu Kooperativa (SEKOOP), Elizário Ferreira, hateten ninia parte sente triste tanba Kooperativa Kréditu Uniaun Fini Naroman Caibada harii kle’ur ona maibé la dezenvolve an hanesan kooperativa.

“Ohin ha’u mai haree relatóriu ne’ebé mak dirijente Kooperativa Uniaun Fini Naroman Caibada hato’o ne’e halo ha’u triste tanba kooperativa halo jestaun ladún di’ak no agora kooperativa la dezenvolve an,” Elizário Ferreira dehan bainhira hala’o vizita ba Kooperativa Uniaun Fini Naroman Caibada, Baucau, kuarta (20/01/2021).

Governante ne’e haktuir, bazeia ba relatóriu ne’ebé dirijente kooperativa sira hato’o, kooperativa laiha rendimentu.

Tanba ne’e, Governante ne’e husu Kooperativa Kréditu Uniaun Fini Naroman Caibada atu organiza asembleia ida hodi buka solusaun ba problema.

“Ha’u husu ita-boot sira atu organiza asembleia ida, atu hadi’a jestaun kooperativa refere nune’e hosi asembleia ne’e dirijente kooperativa bele halibur membru sira hotu, atu ko’alia no iha konkordánsia katak kooperativa  ne’e hakarak kontinua ka lae,” nia fó hanoin.

Tanba, tuir nia, kooperativa ida atu la’o bá-oin ne’e hosi membru sira-nia vontade maibé kuandu laiha entaun susar kooperativa ida atu la’o no dezenvolve an.

“Ita hatene kooperativa signifika koopera ba malu, tanba ne’e presiza iha asembleia ida atu haree posibilidade sira. Se lae, labele la’o bá-oin no ita-boot sira halo pedidu ba SEKOOP husu atu apoiu buat ruma sei la apoiu. Tanba ne’e, husu atu hadi’a buat sira-ne’e nune’e kooperativa ne’e bele la’o di’ak,” Elizário informa.

Iha fatin hanesan, Xefe Administrasaun Finansa Kooperativa Kréditu Uniaun Fini Naroman Caibada, Jaimito Soares hateten ninia parte anota no sei konsidera preokupasaun Sekretáriu Estadu Kooperativa, Elizário Ferreira nian no sei organiza enkontru ho dirijente no membru kooperativa sira Uniaun Fini Naroman Caibada atu fó solusaun ba problema.

“Durante ne’e ami rekoñese membru sira Uniaun Fini Naroman Caibada ladún iha koordenasaun ne’ebé di’ak. Tanba ne’e, Kooperativa Caibada la’o ladún di’ak, maibé ami sei túr hamutuk hodi buka solusaun ba problema sira nune’e bele hetan solusaun,” nia hateten.

 Jornalista: Natalino Costa    

Editór: Xisto Freitas 

PUBLISIDADEiklan

HAKEREK NO HATÁN

Please enter your comment!
Please enter your name here