Sekretáriu Estadu Arte no Kultura, Teófilo Caldas. Imajen/António Gonçalves

DILI, 22 janeiru 2021 (TATOLI) – Sekretáriu Estadu Arte no Kultura (SEAK), Teófilo Caldas aprezenta no husu ona ba Primeiru Ministru (PM), Taur Matan Ruak, atu fó apoiu ba planu konstrusaun edifísiu muzeu nasionál no sentru kulturál, iha Dili.

“Ha’u relata ona ba Primeiru Ministru kona-bá estabelesimentu sentru kulturál no muzeu nasionál, husu mós atu fó apoiu ba planu ida ne’e,” Teófilo Caldas, hateten ba jornalista sira iha Palásiu Governu, kinta ne’e.

SEAK husu mós ba Xefe Governu atu fó kompeténsia ba Sekretáriu Estadu Terras no Propriedade (SETP), Mário Ximenes, nune’e bele atribui rai iha área Hudi Laran, hodi prepara orsamentu ba konstrusaun iha 2022.

Iha antesipasaun, Teófilo Caldas orienta ona ekipa tékniku hodi prepara dezeñu no Bill Of Quantity (BOQ) ba konstrusaun ne’e ho kustu ne’ebé menus hosi millaun $5.

“Ha’u orienta ona ekipa sira atu halo dezeñu no BOQ ba sentru kulturál no muzeu nasionál ne’e labele ho kustu boot to’o kedan millaun $5 ka 10. Ne’e ha’u la presija. Ha’u hakarak kustu ne’ebé ki’ik, importante tenki iha espasu atu iha kompetisaun ruma bele utiliza,” Teófilo subliña.

Governante ne’e dehan, Primeiru Ministru Taur Matan Ruak mós haree sentru kulturál no muzeu nasionál ne’e importante tebes ba estadu Timor-Leste iha futuru.

“PM Taur mós konsidera katak, bainhira sentru ne’e establese ona, sei fó reseita ba Estadu iha futuru,” nia informa.

Tanba ne’e, parte SEAK sei halo planu, bainhira estabelese ona sentru ne’e, ema hotu tenke sosa billeti mak bele halo vizita, liuliu sira ne’ebé hakarak halo peskiza, atu bele kontribui osan ba kofre Estadu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here