Primeiru-Ministru, Taur Matan Ruak, prezide Retiru VIII Governu Konstitusionál, iha salaun Ministériu Finansa, Aitarak-laran, sesta (22/01). Imajen TATOLI/Egas Cristovão

DILI, 22 janeiru 2021 (TATOLI)—VIII Governu Konstitusionál realiza retiru dahuluk iha tinan ne’e ho tema “Tinan 2021: hahú rekuperasaun ekonómika ho transformasaun”, iha ámbitu preparasaun implementasaun Orsamentu Jerál Estadu (OJE) 2021.

Iha intervensaun, Primeiru-Ministru (PM), Taur Matan Ruak, afirma pozisaun Governu desde elaborasaun to’o faze implementasaun OJE 2021, katak tinan ne’e hahú hadi’a ekonomia rai-laran hafoin situasaun COVID-19 ne’ebé kuaze paraliza atividade hotu.

Primeiru-Ministru, Taur Matan Ruak. Imajen TATOLI/Egas Cristovão

“Retiru ne’e realiza  iha ámbitu preparasaun implementasaun Orsamentu Jerál Estadu 2021, ne’ebé hanesan tinan atu Governu marka inísiu rekuperasaun ekonómika,” Xefe Governu hateten, iha ámbitu retiru ne’ebé realiza iha salaun Ministériu Finansa, Aitarak-laran, sesta ne’e.

Iha sorin seluk, Portavós Governu no Ministru Prezidénsia Konsellu Ministru, Fidelis Manuel Leite Magalhães, haktuir retiru ne’e hodi halibur ideia hamutuk hodi implementa programa bazeia ba orsamentu ne’ebé prevee ona iha tinan ne’e.

“Aprezentasaun hosi Ministru Finansa kona-ba planu rekuperasaun ekonómika, atu enkuadra filafali membru Governu, hodi haree vizaun jerál no objetivu sira hosi inisiativa programa rekuperasaun ekonómika ne’ebé maka Governu iha,” informa Ministru Fidelis.

Antes ne’e, Governu iha ona planu rekuperasaun ekonómika, ne’ebé kompostu hosi medida 71 iha kurtu, médiu no longu prazu, ne’ebé Governu hahú implementa ona iha jullu 2020 to’o 2023, ne’ebé ninia foku ba área prinsipál ualu hanesan agrikultura, industria no turizmu, setór ekonómiku, abitasaun, edukasaun, saúde no protesaun sosiál ne’ebé ho modu transversál, inklui aspeitu institusionál no ambientál.

Notísia relevante: Komisaun planu rekuperasaun ekonómika rekomenda medida 71 hosi sub-setór ualu

Aleinde ne’e, ekipa Unidade Planeamentu, Monitorizasaun no Avaliasaun (UMPA) halo mós aprezentasaun kona-ba orsamentasaun pur programa.

“Haree ba orsamentu tinan ne’e, ne’ebé bazeia ba programa, membru Governu sira apár tiha ona maibé importante tebes atu hetan informasaun klean liután hodi nune’e evita tiha komplikasaun iha interpretasaun,” governante ne’e akresenta.

Biban ne’e, Xefe Ezekutivu fó mós orientasaun ba membru Governu atu halo avaliasaun durante ne’e no halo serbisu di’ak liután durante tinan 2021.

“Tenke hahú ona hanoin hodi halo planeamentu ba tinan hirak tuir mai durante mandatu VIII Governu nian,” nia akresenta.

Entretantu, iha faze dahuluk planu rekuperasaun ekonómika, atu halo metigasaun ba impaktu COVID-19, liuhosi resposta kurtu prazu, ne’ebé foka evita lakon serbisu , apoia família, impeda enserramentu empreza, ho vizaun ida atu hadi’a nível konsumu no padraun moris.

Ho hanoin hirak ne’e maka Governu inisia programa Cesta Bázika, ne’ebé hanesan programa ida atu apoiu família, no iha biban hanesan envolve produtór agríkola, operadór komersiál produtu ai-han no ijiene pesoál, nasionál no lokál, ho hanoin ida atu halo estímulu ekonómiku ba kurtu prazu no insentiva produsaun no komérsiu.

Programa Cesta Bázika hahú ona desde novembru 2020 no sei ramata iha devereiru tinan ne’e.

Aleinde ne’e, iha mós pakote medida kurtu prazu, ne’ebé ho intensaun atu retoma no hadi’a atividade ekonómiku seluk.

Iha OJE 2021, Governu prevee millaun $123,9 ba pakote rekuperasaun ekonómika atu finansia medida ne’ebé dezeña ona.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here