DILI, 22 janeiru 2021 (TATOLI)–Komisaun A (Justisa no Konstitusionál) iha Parlamentu Nasionál (PN) husu Governu atu kontinua kapasita investigadór sira iha Polísia Nasionál Timor-Leste no Alfándega nian.
“Kuandu ita deskonfia buat ruma, ita presiza halo prova. Maibé molok to’o konseitu deskonfiansa ne’e, ita presiza iha indikasaun entaun indikasaun lori ita hodi prova no peskiza verasidade ne’e ninia indikasaun ne’e tenke jurídiku, labele falsu. Kuandu indikasaun falsu signifika ita-nia sistema seguransa ladún di’ak, ne’e bele fó prejuizu ba Estadu. Ha’u hanoin Governu presiza kapasita,” Prezidente Komisaun A, Deputadu Joaquim dos Santos “Boraluli”, informa ba jornalista sira iha resintu Parlamentu Nasionál, sesta ne’e.
Deputadu Joaquim dos Santos fó hanoin ne’e tanba antes ne’e deskonfia droga iha Estátua Nossa Senhora de Assunção nia laran maibé to’o ikus mai la deteta droga, ne’ebé prosesu investigasaun konjunta entre ekipa PNTL no ekipa alfándega halo.
Prezidente Komisaun A husu Governu liuhosi Ministériu Interiór tenke fó atensaun tanba akontesimentu ida-ne’e hanesan lisaun ida ba instituisaun seguransa nian.
“Ne’e lisaun ida ba ita-nia instituisaun seguransa ninian. Ha’u ko’alia iha administrasaun polítika de’it, ha’u la tama morál no étika,” nia fó hanoin.
Nia hatutan, kazu deskonfia droga ne’ebé ikus mai laiha deteta droga ne’e hanesan referénsia kona-ba frakeza seguransa iha rai laran.
Nia husu Governu atu kapasita profisionál servisu intelijénsia ninian. Nia afirma, estadu iha osan, nusá mak labele ajuda kapasita profisionál investigadór intelijénsia sira para labele halo fallansu iha loron aban.
Jornalista: Evaristo Soares Martins
Editór: Cancio Ximenes
