Eis Prezidente Repúblika, José Ramos Horta, hato'o parabéns ba ofisiál superiór PNTL iha serimónia gradusaun Diploma Jestaun Ezekutiva Polísia, iha Sentru Formasaun Akademia PNTL, Comoro, Dili. Imajen Tatoli/Eugénio Pereira

DILI, 22 janeiru 2021 (TATOLI)–Ofisiál Superiór PNTL na’in-44 ne’ebé ohin simu graduasaun ho Diploma Jestaun Ezekutiva Polísia (DIPJEP) sei kontribui rekursu umanu ba dezenvolvimentu PNTL.

Komisáriu Mateus dehan, foin primeiravez mak instituisaun PNTL halo graduasaun ba líder PNTL sira durante PNTL eziste.

“Ita hotu sente kontente baihira haree graduadu sira hatais toga ne’ebé naroman tebes no nakonu ho esperansa. Estadu iha nia órden públiku ba prosesu dezenvolvimentu nasionál Timor-Leste no kontribui rekursu ba instituisaun PNTL nia susesu,” Segundu Komandante Jerál Polísia Nasionál Timor-Leste (PNTL), Komisáriu Polísia, Mateus Fernandes, hateten liuhosi deskursu iha serimónia gradusaun DIPJEP, iha Sentru Formasaun Polísia, Comoro, Dili.

Iha prosesu konstrusaun Estadu, tuir Komisáriu Mateus nia haree, iha dezafiu oin-oin ne’ebé mosu ezije ema hotu atu prepara an nu’udar sidadaun no servidór ne’ebé kompete tuir nesesidade ba Estadu nia presiza.

Nia hatutan, haree ba dinámika sosiál no globál ne’ebé ema hasoru iha moris loron-loron hanesan poténsia ameasa ba dezenvolvimentu Timor-Leste nian, tan ne’e, Oitavu Governu Konstitusionál hasai ona planu espesífiku ba PNTL ho hanoin atu profisionaliza no moderniza PNTL.

Ho planu ne’ebé trasa, Komandu PNTL liuhosi membru Konsellu Superiór PNTL prepara ona estatuta pesoál ho kompoziasaun sei implementa bazeia ba nesesidade sira hanesan, 1), Lei orgánika bazeia ba nesesidade institusionál, 2), Lei dixiplinár, 3) Rezime salariál, 4), Rejime promosaun, 5), Harii Institutu Siénsia Polisiál, Estadu Maiór médiu no topu polisiál no 6) Rejime Espesiál.

Kondisaun sira ne’ebé para nu’udar ezbosu planu dezenvolvimentu sustentável PNTL nian ne’ebé aprezenta ona ba Gabinete Primeiru-Ministru hodi hein desizaun no aprovasaun iha Konsellu Ministru.

Komandu PNTL mós kontinua profisionaliza no moderniza PNTL tuir planu Governu nian hodi foka liubá Inter Disciplinary and MultiDisciplinary Science on IT version no kria kooperasaun dezenvolvimentu ho instituisaun sira seluk.

Líder PNTL sira kompromete atu servisu profisionál no moderniza PNTL hodi define investimentu sustentabilidade nu’udar preokupasaun públiku atu polísia hala’o siira-nia funsaun  ho neutru, imparsiál, lais no kualidade fó atensaun loloos ba alvu ho mutuál kooperasaun timoroan hotu.

Iha fatin hanesan, Komandante Sentru Formasaun Polísia (CFP-sigla Portugeza), Superintendente Xefe, Arquimino Ramos dehan, gradusaun ne’e marka tan istória foun ba PNTL, tanba foin primeiravez halo gradusaun DIPJEP no kursu 11 seluk tan realiza ona.

Bá-oin, nia tenik, PNTL sei halo mós graduasaun ba membru sira ne’ebé tuir ona kursu pedagojia iha Sentru Formasaun Polísia ne’ebé hala’o ona hosi Universidade da Paz (UNPAZ).

Arquimino hatutan, atu hasa’e rekursu polísia, presiza hasa’e sistema formasaun ida-ne’ebé di’ak no relevante ho situasaun TL nian no la haluha nórma internasionál sira.

“Formasaun ba ofisiál superiór sira nu’udar prosesu pre-kualida hodi forma kompeténsia hodi serbí no proteje ita-nia povu liuhosi koñesimentu sira ne’ebé natón no ben preparadu iha situasaun atuál,” nia tenik.

Arquimino esplika, baze legál ba formasaun ne’ebé PNTL hala’o nu’udar instituisaun ensinu PNTL nian hetan lisensa no akredita ona hosi INDIMO-SEPFOPE no ANAAA.

Matéria ne’ebé durante ne’e hanorin ba graduadu na’in 44 ho módulu lima hanesan, 1), Modulu Jestaun, 2), Planeia Bazeia ba Evidénsia, 3) Lei sira kona-ba deklarasaun universál direitu umanu, konstituisaun RDTL, kódigu penál, lei orgánika PNTL, lei seguransa nasionál no lei interna, 4) Sistema Estadu Timor-Leste, no 5) Aprende teoria nasaun seluk hodi aplika iha Timor-Leste.

Entretantu, bá-oin, Sentru Formasaun Polísia mós sei loke tan Institutu Siénsia Polisiál ho diploma tolu hodi fasilita membru PNTL sira hasa’e sira-nia rekursu formasaun ho kualidade hodi serbí Estadu no povu.

Formasaun ne’e hetan apoiu hosi profesór sira hosi Australia Institute Police Management liuhosi parseiru TLPDP-AFP no Universidade da Paz.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here