DILI, 22 janeiru 2021 (TATOLI) – Sekretáriu Jerál Federasaun Karate-Do Timor-Leste (FKTL), António Carlos de Araújo, hateten atu hala’o atividade Karate-do nian hotu ba tinan ida presiza osan hamutuk $50,000.00.
“Kada tinan ami hato’o planu ba Sekretáriu Estadu Juventude no Desportu hodi hala’o atividade hotu ne’e presiza osan $50,000.00, maibé dalaruma Governu fó la tuir saida mak ami husu entaun ami hala’o atividade la másimu,” António Carlos de Araújo hateten hodi responde Agéncia TATOLI, sesta ne’e, iha Jináziu Dili.
Ba tinan ne’e, FKTL haruka ona proposta ba Sekretaria Estadu Juventude no Desportu (SEJD) liuhosi Konfederasaun Desportiva Timor-Leste (CDTL) maibé seidauk iha resposta.
Nia dehan, hosi FKTL hahú to’o ohin loron seidauk hetan apoiu hosi patrosinadór sira, maibé Governu mak kada tinan sempre aloka orsamentu hodi hala’o atividade.
Jornalista : Hortencio Sanchez
Editór : Francisco Simões
