Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 21 janeiru 2021 (TATOLI)–Sekretaria Estadu Kooperativa (SEKOOP) hamutuk ho Institutu Nasionál Dezenvolvimentu Mão de Obra (INDIMO), halo selesaun ba funsionáriu sira hosi Sekretaria Estadu Kooperativa (SEKOOP), hodi sertifika sira sai formadór iha área formasaun kooperativa.

“Ohin no aban ami sei hala’o semináriu formasaun selesaun ba formadór sira. Tanba ne’e, marka mós prezensa husi INDIMO nune’e bele avalia,” Sekretáriu Estadu Kooperativu, Elizário Ferreira, ba jornalista sira hafoin halo abertura semináriu formasaun selesaun ba formadór sira iha Federasaun Hanai Malu, Bairru Pité, kinta ne’e.

Nia dehan, funsionáriu sira ne’ebé tuir selesaun hodi hetan sertifikadu husi INDIMO maioria mai husi  funsionáriu kooperativu.

“Durante ne’e funsionáriu sira-ne’e mak fó formasaun ba membru  no dirijente kooperativa sira, maibé komu laiha selesaun definitiva ida ba sira atu sai formadór loloos. Tan ne’e, ho semináriu ne’e, bele define ona sira-nia nivél  nu’udar formadór iha área kooperativa,” Elizário haktuir.

Iha fatin hanesan, Ofisiál Programa husi INDIMO, Arlindo da Costa hateten semináriu selesaun ba formadór  ne’ebé parte SEKOOP ho nia funsionáriu sira halo nu’udar koordenasaun entre SEKOOP no INDIMO.

Nia esplika, INDIMO nia prezensa iha-ne’ebá atu observa prosesu selesaun funsionáriu SEKOOP nian atu sai formadór iha SEKOOP.

“Ami-nia prezensa iha-ne’e la’ós avaliadór, maibé sai hanesan observadór tanba prosesu sira tuirmai ne’e, ka rezultadu avaliasaun ne’e sei enkamiña bá iha INDIMO,” nia subliña.

Nia esplika, hosi INDIMO mak sei haree atubele determina formadór sira-nia kapasidade atu kontinua formasaun sira iha parte pedagójika ninian.

 Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here