Lansamentu utilizasaun sistema GRP ba RAEOA, iha salaun MF, Aitarak-laran, kinta (21/01). Imajen TATOLI/Antónia Gusmão

DILI, 21 janeiru 2021 (TATOLI)—Governu sentrál liuhosi Ministériu Finansa (MF) hamutuk ho Rejiaun Administrativa Espesiál Oé-cusse Ambeno (RAEOA) ofisialmente halo lansamentu ba sistema integradu informasaun jestaun finanseira ka Government Resource Planning (GRP).

Tanba ne’e, RAEOA bele utiliza ona sistema integradu informasaun jestaun finanseira ba ezekusaun orsamentu.

Sistema ne’e lansa hosi Ministru Finansa, Rui Gomes no Prezidente Autoridade RAEOA, Arsénio Paixão Bano.

“Sistema ne’e ninia benefisiu maka aban no bainrua bainhira RAEOA iha tranzasaun, gastu, despeza, no reseita sira ne’e mós sei tau iha portál transparénsia ne’ebé públiku bele asesu,” Ministru Rui, informa iha salaun MF, Aitarak-laran, kinta ne’e.

Ho lansamentu ne’e, Autoridade RAEOA sei hahú ezekuta orsamentu liuhosi sistema ne’ebé Governu sentrál utiliza  hodi bele promove liután transparénsia no hatán duni ba ezijénsia hosi órgaun fiskalizadór sira hanesan Parlamentu Nasionál no Tribunál Konta, hodi halo akompañamentu ba ezekusaun orsamentu iha administrasaun públiku.

Governante ne’e dehan, bainhira utiliza sistema ne’e RAEOA sei benefisia hosi módulu hanesan finansa, aprovizionamentu, jestaun kontratu, jestaun tezouru pagamentu, kontabilidade, no relatóriu finanseira, módulu orsamentu, módulu ba rejistu patrimóniu, e-services ou Autoridade Tributária, ASYCUDA no Autoridade Aduaneira.

Maski nune’e, hafoin lansamentu seidauk bele asesu informasaun ne’ebé tau iha portál transparánsia, maibé hahú aban (22/01) mak foin bele.

Biban ne’e, Ministru apresia ho esforsu ekipa téknika MF ho RAEOA, hodi ikus-mai bele realiza lansamentu ba sistema importante ne’e.

Iha fatin hanesan, Prezidente Autoridade RAEOA, Arsénio Paixão Bano, konsidera sistema ne’e importante tebes ba RAEOA hodi ezekuta osan di’ak liután.

“Agradese ba serbisu tékniku Ministériu Finansa ne’ebé mak durante ne’e halo akompañamentu ba ekipa RAEOA hodi ikus mai bele realiza duni implementa sistema ne’e, no ha’u fiar katak kooperasaun ne’e Oé-cusse kontinua la’o ba oin ho orsamentu ne’ebé alokadu,” nia dehan.

Tuir Prezidente Autoridade ne’e, sistema ne’e di’ak tanba bele kontrola ezekusaun orsamentu, ne’ebé gasta duni ba nesesidade povu no iha tempu hanesan bele ajuda RAEOA implementa planu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here