Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

DILI, 21 janeiru 2021 (TATOLI)–Segundu Komandante Polísia Munisípiu Dili, Superintendente Euclides Belo alerta ba abitante sira ne’ebé hela iha kuarentena labele koko halai sai bá hasoru família iha uma.

Superintendente Euclides husu atensaun liuliu ba timoroan na’in-118 iha kuarentena atu kumpre regra Estadu Emerjénsia (EE) dasiak  ne’ebé abranje iha territóriu nasionál tomak, hahú vigora hosi tuku 00:00 loron 03 janeiru 2021 no sei termina tuku 23:59 loron 01 fevereiru 2021.

“Alerta ba ita-nia alin no família sira ne’ebé to’o ona mai Dili hamutuk ema na’in-118 ne’ebé hela iha kuarentena ami sei la tolera bainhira ita-boot sira koko atu halai sai. Kuandu halai sei hetan sansaun maka’as, tanba polísia halo seguransa maka’as. Ita-boot sira tenke kumpre hodi evita COVID-19,” Segundu Komandante Euclides Belo ba jornalista iha Kuartél Komandu PNTL, Caicoli, Dili, kinta ne’e.

PNTL Dili koloka ona membru PNTL hodi halo seguransa másimu iha fatin kuarentena sira hanesan Otél YQ simu abitante na’in-17, Time Squer ema na’in-26, Leokase na’in-16, Kristo Rey Nova Horizonte na’in-44, Kilatama na’in-10 kompostu feto 5, mane 5, Otél Vila-Verde na’in-14 no Sentru Izolamentu.

PNTL husu mós ba família no kolega sira labele vizita ba fatin kuarentena sira nune’e bele prevene Covid-19.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here