Segundu Komandante PNTL, Superintendente Euclides Belo aprezenta suspeitu na’in-rua ho inisiál TDA no ADC ne'ebé envolve kazu "foti subar" motór tolu. Imajen Tatoli/Eugénio Pereira  

DILI, 21 janeiru 2021 (TATOLI)–Komandu Polísia Munisípiu Dili detein suspeitu maun-alin ho inisiál TDA no ADC ne’ebé envolve iha “lori subar” komunidade nia motór hamutuk tolu (3) iha área Munisípiu Dili.

Segundu Komandante PNTL, Superintendente Euclides Belo dehan, suspeitu na’in rua PNTL detein de’it iha sira-nia rezidénsia, iha kuarta (20/01), hodi ezekuta mandadu buska no apreensaun hosi Tribunál Distritál Dili ho númeru prosesu NUC-06442/20 ba krime na’ok motór.

PNTL halo mós apreensaun ba motór tolu ne’ebé suspeitu sira “lori subar” hanesan Beat Street ida ho xapa matríkula O-2768, Honda Revo rua ho xapa matríkula M-1738 no D-2297.

“Sidadaun na’in rua ho inisiál TDA no ADC envolve mós kazu krime furtu,” Superintendente Euclides ba jornalista iha Kuartél Komandu PNTL, Caicoli, Dili, kinta ne’e.

Euclides rekoñese katak suspeitu na’in rua ne’e iha korelasaun servisu ho suspeitu na’in tolu ho inisiál JDX, JDPC no GDA ne’ebé PNTL detein iha 10 dezembru 2020, tanba envolve  iha “lori subar” motór Beat haat iha área Dom Aleixo-Dili. Suspeitu sira-nia kazu hetan ona desizaun hosi tribunál hodi tama komarka Becora.

“Suspeitu sira-ne’e iha ligasaun, maibé ami labele temi sira-ne’e família, tanba lei la haree ba família,” nia esklarese.

Euclides Belo hatutan suspeitu na’in rua halo sira-nia atividade “lori subar” motór ne’e kle’ur ona, no parte PNTL investe kle’ur foin deskobre sira-nia paradeiru.

Ho krime ne’ebé suspeitu na’in rua komete, PNTL sei halo investigasaun durante oras 72 no bainhira ramata sei aprezenta ba Tribunál Distritál Dili.

Komandu PNTL Dili rasik durante ne’e halo apreensaun ba motorizada hamutuk 19 ne’ebé laiha dokumentu no aprezenta ona ba Ministériu Públiku atu prosesu.

PNTL Dili ho ekipa Servisu Informasaun Polísia (SIP) sei kontinua buka tuir suspeitu sira seluk ne’ebé envolve kazu “lori subar” motór iha Dili no munisípiu sira.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here