Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

DILI, 21 janeiru 2021 (TATOLI)–Servisu Investigasaun Kriminál Nasionál (SIKN) hamutuk ho Komandu F-FDTL, halo ona ezame balístiku ba embolku ne’ebé autór deskoñesidu uza hodi tiru mate komunidade nia karau iha Weto, Suku Dotik, Postu Administrativu Alas, Munisípiu Manufahi.

Portavóz Polísia Nasionál Timor-Leste (PNTL), Superintendente Xefe, Arnaldo de Araújo deklara parte Servisu Informasaun Polísia (SIP), Servisu Nasionál Intelijénsia (SNI) no J2 mós tuun ona ba terrenu hodi buka tuir suspeitu sira-nia paradeiru.

Notísia relevante:Kazu tiru karau iha Dotik, na’in ba karau tenke hato’o keixa  

“Ita-nia Servisu Informasaun Polísia mós tuun ona ba terrenu halibur dadus no investiga iha-ne’ebá hodi foti embolku balun ne’ebé uza hodi tiru para halo ezame balístiku. Prosesu sei la’o hela. To’o tempu ita sei hatene sé mak envolve,” Arnaldo ba jornalista iha Kuartél Komandu Jerál PNTL, Caicoli, Dili, kinta ne’e.

Arnaldo salienta, hafoin halo investigasaun ramata, parte PNTL sei fó-sai relatóriu investigasaun iha tempu besik.

Komandu PNTL Manufahi rasik halo ona prosesu investigasaun no rekolla informasaun hosi abitante balun ne’ebé durante ne’e halo atividade kasa rusa no fahi-fuik iha Manufahi nian hodi buka tuir suspeitu sira-nia paradeiru.

Kazu tiru karau akontese iha 14 janeiru 2021, tuku 21:20 Otl. Asaun tiru ne’e rezulta komunidade nia karau tolu mate, karau rua ema konsege tula ba karreta no karau ida mate husik hela iha fatin akontesimentu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here