DILI, 21 janeiru 2020 (TATOLI)–Parlamentu Nasionál sei diskute hodi halo alterasaun ba artigu balun iha Kódigu Prosesu Sivíl kona-ba modalidade kazamentu.
Prezidente Komisaun A (Justisa no Konstitusionál), Deputadu Joaquim dos Santos ‘Boraluli’, hateten komisaun aprova ona relatóriu no paresér ba proposta-lei Nú. 10/V (2ª) kona-ba alterasaun ba artigu balun iha Kódigu Prosesu Sivíl.
“Ohin, ami aprova relatóriu no paresér kona-ba autorizasaun lejizlativa, kona-ba altera artigu balun iha Kódigu Sivíl, husu ba parlamentu atu aprova,” Deputadu Joaquim dos Santos informa ba Agência TATOLI, iha resintu Parlamentu Nasionál, kinta ne’e.
Prezidente Komisaun A ne’e fundamenta, razaun atu halo alterasaun ba lejizlasaun Kódigu Sivíl ne’e refere liubá modalidade kazamentu nune’e proteje direitu sidadaun hotu-hotu no labele hamosu diskriminasaun.
Nia esplika, objetivu hosi alterasaun ne’e labele iha diskriminasaun ba ema ka grupu tanba de’it diferensa relijiaun.
Nia argumenta, relatóriu no paresér kona-ba alterasaun kódigu sivíl liuliu modalidade kazamentu sivíl iha artigu 1475 hosi Lei númeru 10/2011 kona-ba kazamentu sivíl, katóliku no barlakeadu monogámiku.
“Ami haree proposta alterasaun ne’e laiha indikasaun kona-ba irregularidade ka violasaun hosi lei fundamentál repúblika ninian, tanba ne’e mak Komisaun A rekomenda ba parlamentu bele aprova,” Prezidente Komisaun A ne’e justisa razaun alterasaun.
Iha parte seluk, Komisaun A aprova ona relatóriu no paresér kona-ba ba proposta-lei nº.10/V/(2ª)-11/V/(2ª)-atu aprova rejime jurídiku arbitrajen hodi halo alterasaun ba Kódigu Prosesu Sivíl.
Nune’e mós Komisaun A aprova relatóriu no paresér ba proposta-lei Nú. 5/V (2ª)-autorizasaun lejizlativa kona-ba baze jerál organizasaun administrasaun. Proposta alterasaun tolu ne’e mai hosi Governu.
Jornalista: Evaristo Soares Martins
Editór: Cancio Ximenes
