Deputadu Partidu Demokrátiku, Adriano do Nascimento. Imajen Tatoli/Egas Cristovão.

DILI, 21 janeiru 2021 (TATOLI)–Deputadu Bankada Partidu Demkorátiku (PD), Adriano do Nascimento, apoia polítika Governu nian ne’ebé deside halo vasinasaun ba komunidade hotu tanba dalan únika atu moras COVID-19 labele tama ba ema idak-idak isin.

Notísia Relevante: PM prontu vasina “dahuluk” ai-moruk AstraZeneca prevene COVID-19

Nia fundamenta, oras ne’e Timor-Leste enfrenta hela situasaun ida atu halo prevensaun hasoru pandemia ne’e tanba seidauk iha transmisaun lokál.

Nia dehan, pasu dahuluk mak Governu prepara ona fatin kuarentena no izolamentu.

“Pasu segundu mak halo vasinasaun, ne’e tenke halo. Nasaun barak mak halo ona vasinasaun tanba nu’udar dalan úniku atu prevene, nune’e moras ne’e labele tama iha ita-nia isin, la’ós kura. Vasinasaun ne’e mós hanesan prevensaun ida,” Deputadu Adriano do Nascimento informa ba jornalista sira iha resintu Parlamentu Nasionál, kinta ne’e.

Nia espera, Governu iha rekursu finanseira natoon hodi implementa teste masal ne’e tanba importante tebes ba sosiedade.

Deputadu Adriano do Nascimento argumenta, atu vasina uluk ukun-na’in sira ka komunidade ne’e la’ós kestaun maibé Timor-oan idak-idak tenke prepara-aan hodi halo prevensaun.

“Ita iha Timor sempre politiza moras ne’e maibé hamate ona ema iha Timor Osidentál. Ha’u iha Suai, iha fronteira Betun ospitál de’it mós labele simu ona pasiente sira. Signifika moras ne’e besik ona ita,” nia akresenta.

Nia afirma, bainhira seidauk iha mate ba moras ne’e mak lakohi vasina maibé kuandu mate ona bele oferese-aan ba vasina.

Entretantu, Xefe Bankada CNRT, Deputadu Duarte Nunes, husu vasina uluk ukun na’in sira hafoin halo vasinasaun ba komunidade.

”Vasina ne’e sé mai karik, ha’u hanoin ezemplu ne’ebé ke nasaun boot sira halo, boot sira uluk tiha,” Xefe Bankada CNRT, Duarte Nunes, preokupa ho kualidade vasinasaun tanba ai-moruk ida ninia kualidade balun la hanesan.

Xefe Bankada CNRT ne’e simu informasaun ida hosi ema balun, vasinasaun ne’e kuaze nia kualidade ne’e, balun 95%, 90%, 80% no 75%.

Nia husu atu vasina ema ida, tenke esplika ninia kualidade tanba ema-nia saúde la hanesan, presiza Governu esplika ba sira katak ida-ne’e efetivu bele kontra 100% ka lae.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here